19-جي يوزايلليك اينسانين شخصي آزادليغي ايدئياسيني، ائلهجهده برابرليك ايدئياسيني بير سيرا آغيرسيناقلارا چكدي. فرانسا اينقيلابينين قانلي حاديثهلري، دئموكراتيك اؤلكهلرده«چوخلوغون تيرانيياسي[1]» كونستان[2] و ميللين[3] تصوير ائتديكلري كيمي، جمعيييتين اينسانين شخصي حياتينا موداخيلهسي 19-جو عصرين سونلاري، 20-جي عصرين اووللرينده اينتئللئكتواللار[4] آراسيندا اعئتراض دالغاسي دوغوردو. ياراديجي شخصيتلرشخصي آزادليقلا وطنداش برابرلييي آراسيندا اييامي- قديمدن مؤوجود اولان ضيديييتلردن دانيشماغا باشلاديلار.
بير چوخ اينتئللئكتواللار دئموكراتييا و كاپيتاليزمين اؤزونده داشيديغي كونفورميزمه[5] و آلوئرچيليك روحونا قارشي قيياما قالخديلار. بوغوجو قايدا- قانون موحيطينين حؤكم سوردويو جمعيييت صنعتكاري ازيردي، لاكين ان دهشتليسي بو ايدي كي، ايندي، صنعتكار ماددي جهتدن ده كوتلهنين«بسيط» ذؤوقوندن آسيلي ايدي.
اينجهصنعت «خالقا مخصوص» اولماغا باشلاميشدي. اگر اوولكي زامانلاردا صنعتكار ماددي جهتدن عئلملي، بيليكلي آريستوكراتدان[6] آسيلي ايديسه، ايندي، بازار موناسيبتلري شرايطينده ذؤوقلري و صنعتكارا وئريلن قييامتي يئنيآليجي- كاپيتاليست جمعيييتينين او قدر ده اينجه ذؤوقو اولمايان اورتا وطنداشي موعيين ائديردي. بورژوا ذؤوقونون يدهيينده [7]سورونمك ايستمهين اينتئللئكتواللار ياراديجي شخصيييتي ازن برابرليكدن «فؤوقالاينسان»ين حوقوقو علئيهينه ايمتيناع ائتمهيه چاغيريرديلار.
بو «رومانتيك قييام»ين ليدئرلريندن بيري ده آلمان فيلوسوفو نيچه (1900-1844 ) ايدي. نيچه پروتئستانت كئشيشي عاييلهسينده دوغولموشدور. اوشاقليقدان ديني موحيطدهكي حياطي موشاهيده ائتميش نيچهده دينه، ائلهجه ده بورژوا جمعيييتين درين قاتلاريندا گيزلنميش حقيقي موتيولريني آچيب گؤسترمهيه چاليشير، غرب مدنيييتيني اؤزونو آلداتما مدنيييتي آدلانديريردي.
نيچهنين فيكرينجه، اينساني حاكميييت عزمي و دونياني اؤز ايستكلرينه اويغون دهييشمك ائحتيراصي ايداره ائدير. برابرليك ايستئعدادسيزلاري تؤرهديب چوخالدير. لياقتي ايطاعت و موتيليكله[8] عئينيلشديرن خريستيان اخلاقي اينسانين اؤز ايمكانلاريندان تام ايستيفاده ائتمهسي يولوندا باشليجا انگلدير. آللاه اؤلوب.--- دئيه نيچه بيان ائديردي،--- اينسانين آزاد ياراديجيليغي و نائليييتلري ائراسي[9] باشلانيب.
نيچه ياراديجيليغينين غربين اينتئللئكتوال فيكرينه گوجلو تأثيري اولموشدو. نيچه نين ميلليييت چيلييه،آنتيسئميتيزمه[10]، دؤولتين زور سيياستينه اولان نيفرتينه باخماياراق، فاشيستلر، سوسياليست تئررورچولار و عوموميييتله اؤزلريني «فؤوقالاينسان» سايانلار اونون ايدئیاسيني تحريف ائدهرك اؤزلرينه بايراق ائتميشديلر. اونلار اوچون «فؤوقالاينسان» بشرييت قارشيسيندا، عالي مقصده يئتمك نامينه معنوي عؤهدهليكلردن آزاد ائديلمهلي اولان اينسان دئمك ايدي.
[1] تيرانييا:دئسپوتيزم و ايستيبدادا اساسلانان دؤولت حاكيمييتي فورماسي
[2] بنجامين كونستان:فرانسالي جاميعهشوناس
[3] ميلل:جان استووارت ميل؛فيلوسوف و ايقتيصادچي
[4] اينتئللكتواللار: ضياليلار يا آيدينلار
[5] كونفورميزم:جماعت رنگينه دؤنمك، تقليد ائتمك
[6] آريستوكرات: اصيلزاده، كوبار
[7] يدهيينده :يدكينده
[8] موتيليك:كئچينمك و موخاليفله بيرگه ياشاماق
[9]ائرا: تاريخي دوره
[10]آنتي سئميتيز: يهوديلره قارشي عداوت
