- يئنه ده توخويورسان؟
قادين باشيني قالديردي. اونون هامار دهييرمي صيفتي واردي. مولاييم قونور گؤزلري آني اولاراق ارينين باخيشلاري ايله راستلاشدي. تئز ده گؤزلريني اوندان چکدي و باشيني آشاغي ساليب اؤز ايشي ايله مشغول اولماغا باشلادي.
- گؤردويون کيمي، عزيزيم.
- ائله هئي توخويورسان! اؤزونه باشقا بير مشغولييت تاپسانا.
قادين کؤکسونو اؤتوردو، جاواب وئرمهدي.
- نييه دينميرسن، هه؟- اري ال چکمهدي.- يوخسا ديلين- آغزين قورويوب؟
- آخي سن اؤزون، تونيو، تاپشيردين کي، يوخاريدا اؤز اوتاغيمدا دئييل، بوردا اوتوروم،- قادين باشيني قالديرمادان جاواب وئردي.
- پاه! بوردا بير کس اوتورماليدير، يا يوخ؟ يوخسا سن ايستهييرسن کي، هانسيسا بير آوارايا پول وئريب خانيم کيمي بوردا اهيلشديريم، او دا لاققيرتي وورسون، هه؟
ياغا بولانميش اؤنلوک تاخان، اؤز ايشينين ماهير اوستاسي اوجا بويلو گنج اوفيسيانت[1] اونلارا ياناشيب حاق- حئساب قبضيني و بئش دوللارليق کاغيذ پولو ستولون اوستونه قويدو. قادين پولون قاليغيني[2] اونا اوزاتدي و بير آنليغا باخيشلاري اونون اوزونده ايليشيب قالدي. اوفيسيانت ساکيت باخيشلا اونون اريني سوزدو. اونون باخيشيندا ايستئهزالي بير تبسسوم پارلاييب تئز ده يوخ اولدو. اري نين ستول اوزرينده اوزانيقلي الي بيايختييار دويونلندي. او، نهسه تعججوبلو بير شئيي ايلک دفه گؤرورموش کيمي بارماقلارينين گرکينليکدن آغارميش سوموکلرينه باخدي و دوداقآلتي سؤيوش سؤيدو. قادين باشيني قالديردي و سويوق باخيشلارلا اونو سوزدو.
- آخماق اولما، آنتونيو.
آنتونيو اؤزونو قيشقيرماقدان گوجله ساخلاييردي.
- بو هله چوخ داوام ائدهجک؟
- بونو من سندن سوروشمالييام. هله آجيغيني مندن چوخمو چيخاجاقسان؟
- سنين، سنين بو ريياکارليغين... او، حيددتله پيچيلدادي.
اونون خيردا گؤزلري غضبدن آليشيب يانيردي. قادين سکسکهلي حالدا اطرافينا گؤز گزديردي.
- ياواش،- دئدي،- جاماعات باخير. آخي مندن نه ايستهييرسن؟ بلکه يوخاري قالخيم، هه؟
ارينين صيفتي واهيمهلي ايفاده آلميشدي.
- يوخ!- او داها اؤزونو ساخلايا بيلمهيهرک قيشقيردي. درحال دا سسيني آلچالديب داوام ائتدي.- داها من دؤزه بيلميرم، ائشيديرسنمي؟- او، سسيني بير آز دا آلچالديب پيچيلتييا کئچدي.- واللاه اؤلدوررم، سني.
قادين يئنه باشيني آشاغي ساليب توخوماغينا داوام ائتدي.
- حالين هئچ اؤزونده دئييل. گاه دانيشير، گاه قيشقيرير، گاه دا سؤيوش سؤيورسن. آخي نييه؟
- نييهسيني سن چوخ گؤزل بيليرسن.
- من؟ منيم هانسي حرکتيم سني اؤزونو بئله آپارماغا وادار ائدير؟ آخي سن مني نهده قيناييرسان؟ مگر من سنه ياخشي عؤمور- گون يولداشي اولماميشاممي؟ مگر من سنين بوتون ايستکلريني يئرينه يئتيرمه ميشممي؟ سن اؤزون ياخشي بيليرسن کي، من هر آخشام بوردا هئچ ده اؤز خوشوملا اوتورمورام. سنين بو قيسقانجليغين آغليني لاپ اليندن آليب.
- ياخشي، ياخشي! من سني خبردار ائلهديم. داها هئچ نه دئميه جهيم.- او، گؤزلريني ستولدان- ستولا گزديردي. اوفيسيانت اؤز چيرکلي اؤنلويونده قاشقاباقلي حالدا آرابير گؤرونوب يوخ اولور، تانيش اولمايان تکببورلو قوناقلارا خيدمت ائدير، داييمي موشتريلرينين سالامينا قيسساجا جاواب وئريردي. ياراشيقلي، اوجابويلو اوفيسيانت اللي و چئويک ترپهنيردي. او، نزاکتلي و خوشرفتار ايدي. آنتونيو ايستر- ايستهمز بو گنجين قيوراق، اينجه حرکتلريني اؤزونون يؤندمسيز يئريشي ايله موقاييسه ائتدي و کيني قايناييب جوشدو. اوفيسيانت بير ده اونلارين ستولونا ياخينلاشدي، زالا[3] گؤز گزديردي و آني اولاراق باخيشلاري قادينين صيفتينه زيللندي. آنتونيو کناردا دورموشدو. ائله بو آن او، اوفيسيانتا طرف يئريدي. گؤزلرينه سانکي دومان چؤکموشدو. او اؤز آدديملارينين سسيني بئله ائشيتمير، آياقلاري آلتدا دؤشهمهني حيسس ائتميردي. آنتونيو ياخينلاشاندا اوفيسيانت هاراسا يوخ اولدو. باشيني آشاغي ديکميش آروادي ايسه اوولکي يئرينده اوتوراراق اؤز مشغوليتينده ايدي. ستولون اوستونده ايچريسينده ديشقوردالايان اولان کيچيک بير گولدان واردي. آنتونيو ستولا طرف اهييلهرک غئيري- ايرادي گولداني الينه گؤتوردو. و بارماقلاريني سيخدي. گولدان خيرچيلداياراق پارچا- پارچا اولدو، آغاج ديشقوردالايانلار اطرافا سپهلندي. اونون بارماقلاري آراسيندا نازيک قيرميزي خط عمله گلدي و بو قيرميزي خط اوزاناراق الي نين آرخا طرفينه کئچدي.
- او سنه نه دئدي؟- سوروشدو.
قادين باشيني قالديردي، باخيشلاري توققوشدو. قادينين گؤزلري بيردن بؤيودو، سانکي حدقهسيندن چيخاجاقدي.
- بورا باخ،- او، ساکيت طرزده ديللندي،- دئيهسن سن لاپ آغليني ايتيرميسن. دئ گؤروم مندن نه ايستهييرسن؟ مگر سن اؤزون مني بوردا اوتورتمادينمي؟ من کي، بونو سندن خواهيش ائتمهميشم. آلتي آيدير کي، گونومو گؤي اسکييه بوکموسن. گئجه- گوندوز زهلهمي تؤکورسن. بوتون بونلارا سون قويولماليدير، يا يوخ؟ اؤزونو ييغيشديريب آدام کيمي آپارماسان مندن اليني اوز، واليدئينلريمين يانينا قاييداجاغام. هر شئي سندن آسيليدير، ايکيسيندن بيريني سئچ. آنجاق ياددا ساخلا کي، بو، آخيرينجي دفه اولاجاق. من سنه ياخشي عؤمور- گون يولداشي اولموشام، اؤزونو اوولکي تک آپارسان، بوندان سونرا دا اولارام. آنجاق بوگونکو منظره بير ده تکرار اولسا، داها منيم آديمي توتما.
آنتونيو چئوريلدي، سرخوش و يوخودا گزن آداملار ساياغي کنارا آدديملادي. اوفيسيانتين يانيندان اؤترکن معصوم، هم ده معناسيز بير تبسسوم يئنيدن اونون حيسسلريني جوشدوردو. او، باشي ايله اوفيسيانتا قيسساجا ايشاره ائتدي و مطبخدن کئچهرک آرخا حيطه چيخدي. اورادا دايانيب گؤزلهمهيه باشلادي. آرتيق تيترهمهيينين قارشيسيني آلماغا طاقتي چاتميردي. اوفيسيانت اونون آردينجا چيخدي و داريسقال قارانليق حيطده چکينمهدن اونونلا ياناشي دوردو. او، آنتونيودان هوندوردو. اونون سربست دوروشو دؤيوشدن اوول قيلينجاوينادانين وضعييتيني آنديريردي.
- بورا باخ،- آنتونيو ديللندي. اونون سسي تيترهييردي.- من هر شئيي بيليرم. اوردا سيزين آرانيزدا نه اولوب؟ اونسوز دا هر شئيي بيليرم. دئ گؤروم سيزين آرانيزدا نه اولوب؟
- بيزيم آراميزدا هئچ نه اولماييب. آنجاق بيز ايکيميز ده بئله حساب ائديريک کي، سنين باشينا هاوا گليب.
- چرنلهمه!
- چرنلهمه؟ سن بونو منه دئييرسن؟ منه چرنچي دئييرسن؟
گنج اوفيسيانت ايرهلي شيغيدي. آنتونيو اؤزوندن آسيلي اولماياراق گئري چکيلدي. قورخاقليغينا گؤره اورهيينده اؤزو- اؤزونه نيفرت اوخودو.
- آخي من بيلمهلييم، يا يوخ؟ آز قالير آغليمي ايتيرم.
- اونسوز دا آغليني ايتيرميسن. بئله اولماسايدي، سنين جانيني آلارديم. بورا باخ ائي، موردار دونوز، بيل کي، بيزيم آراميزدا هئچ بير شئي يوخدور. بونا آند ايچه بيلرم. آنجاق قادينا يازيغيم گلير. من سنين يانيندا اونا نه دئديم کي، سن ائشيتمهدين؟ اگر او قادين کيميسه اؤزونه جلب ائديرسه، هر حالدا او آدام من دئييلم. بونو اونا گؤره سنه دئييرم کي، منيم اونا يازيغيم گلير. هر گون سنين کيميسينين شيلتاقليغينا دؤزن باشقا بير قادينا دا منيم يازيغيم گلردي.
- ائله اينديجه سن اونا نه دئدين؟
گنج اوفيسيانت اونون صيفتينه بير سيلله چکدي. آنتونيو دال- دالي چکيلدي.
- من سني اؤلدوررم!- دئيه باغيردي.
- باجارمازسان،- اوفيسيانت ديللندي.- سن مني يالنيز نامردجهسينه اؤلدوره بيلرسن. بس اوندا سنين بارهنده نه دوشونرلر؟ آروادين سني نامرد آدلانديرسا خوشونا گلرمي، ايت اوغلو ايت؟
تک قالميش آنتونيو کورهييني سويوق دووارا سؤيکهدي. او، چتين نفس آليردي. اؤز حيرصي- هيککهسينه گؤره، قورخاقليغينا و کين- کودوراتينه گؤره اؤزونه نيفرت ياغديريردي. بو، حقيقت ايدي: اوفيسيانتي اؤلدوره بيلمزدي. او، باشيني قالديردي و بو داريسقال حيط اوزرينده سانکي مؤحکم ايپک کيمي تاريم چکيلميش اولدوزلو سمايا باخدي. اولدوزلار اوشاقليغيندان اوزاق سيسيلييادا[4] گؤردويو همين اولدوزلاردي. اوندا او، بالاجا بير اوغلان اوشاغي ايدي ، حيات ساده، گؤزل و قايغيسيزدي.
اؤلدوره بيلمز! اؤلوم فيکري اونو هئچ راحات بوراخميردي. آنجاق او، بيليردي کي، داها اوندان سونرا آروادينين اوزونه باخا بيلمز. بيليردي کي، آتا اوجاغيندان اونا يئنيجه پناه گتيرميش، اونون اوچون بوتون دونيادا، حياتين اؤزوندن بئله قييمتلي اولان بو قادين- اونون اوجباتيندان[5] کي، بو حاديثه باش وئرهجکدي،- اونو هئچ واخت باغيشلاماز. آنتونيو آرتيق ياشا دولدوغو، کيفيرلشدييي و کؤکلدييي حالدا، او هله جاوان و خوشاگليملي ايدي. آنتونيو کيمي باشقا کيشيلرين ده اونا مئييل گؤسترمهسي مگر تعججوبلودورمو؟ مگر تعججوبلودورمو کي، کيشيلر گؤزلريني اونون اسمر صيفتينه، قيرميزي دوداقلارينا، شيوه کيمي قاپ- قارا ساچلارينا زيللهييرلر؟ بس او؟ اونلارين ديققتيني جلب ائتمک اوچون بير شئي ائديرمي؟ يوخ! اؤزونون دئدييي کيمي قادين اونا ياخشي عؤمور- گون يولداشي اولموشدو. کؤچوب گئتمک. يئگانه چيخيش يولو بودور. اونو باشقا شهره آپارماق. يئني شراييطده، تانيش اولمايان آداملار آراسيندا داها قايغيسيز ياشايا بيلرلر. او بئله ده ائدهجک. او، يئنه ده باشيني قالديريب يوخاريدا سايريشان، اونون طالئعي تک قارماقاريشيق اولان اولدوزلارا باخدي. ترلي دريسينده سرين گئجه کولهيينين تماسيني حيسس ائتدي و کؤکسونو اؤتوردو. آخير کي، بير قرارا گلميشدي.
آروادي، دئمک اولار کي، راضيلاشدي. بو پلاني قادينين واليدئينلري ايله موذاکيره ائتديلر و بئله بير آدديمين ضروريلييينه اونلاري اينانديرديلار. يقين کي، قادين هردن بير اؤز واليدئينلرين ارينين گئت- گئده آرتان بو قيسقانجليغي و حيرصي- هيککهسي باره ده معلومات وئريرميش. اودور کي، بو قرار واليدئينلري او قدر ده تعججوبلنديرمهدي. عومومييتله، اونلار آنتونيونو آغيللي آدام حساب ائديرديلر. بو سارسيديجي قيسقانجليق خستهلييينه توتولانادک ايسه اونا حتتا خوشرفتار، بير سؤزله، ياخشي ار کيمي باخيرديلار. ائله ياخشي بير ار کيمي کي، اونون هر بير فيکرينه شريک اولور، دئديکلريله راضيلاشيرديلار.
بو قرارا گلديکدن سونرا آنتونيو اؤزونو ياخشي آپارماغا باشلادي. ايشلري او قدر روان گئديردي کي، او، حتتا قراريني دهييشمهيه بئله حاضيردي، لاکين آروادي فيکريندن دؤنمزدي. رئستوراني ساتماق فيکري اورتايا چيخديقدا، همين او اوجا بويلو گنج اوفيسيانت اونو آلماغا حاضير اولدوغونو بيلديردي. آنتونيو ايله اونون آراسيندا موناسيبت هله ده گرگين ايدي. آنتونيو هر وجهله اوندان چکينيردي. اونلار قيمت مسلهسينده راضيلاشما اوچون بير- بيريله اونسيته گيرمک مجبورييتينده قالديقدا موشتري اؤزونو ائله آپاردي کي، سانکي هئچ نه اولماميشدي. اونون آغايانا گولوشو همينکي گولوشويدو. اونون بو گولوشو، توتقون صيفتينده ديشلرينين پاريلتيسي آنتونيونو طبعدن چيخاردي، اؤزونون دوشوندويو کيمي، سؤنوب اؤلزيميش کين و قورخو حيسسيني يئنيدن آلوولانديردي.
بو دفه اوفيسيانت اوولکيندن ده مولاييم و نزاکتلي ايدي. او، سينيورا ويداع هدييهسي باغيشلاماق فيکرينده اولدوغونو بيلديرير و بو فيکرينده ائله نزاکتله عينادکارليق گؤستريردي کي، اونلار ايمتيناع ائده بيلميرديلر. نهايت، گوناورتا آنتونيو ايله اوفيسيانت هدييه سئچيب آلماق چون شهره چيخديلار. جاوان اوغلان بير دوزوم بيللور مونجوق و يا مئداليون هدييه ائتمک ايستهييردي. بو جور شئيلر ساتيلان آنتيکوار ماغازاسينا[6] داخيل اولدولار. پيشتاختا اوزرينده اوست- اوسته قالاق- قالاق شکيل، گولدان، اويونجاق، قادين زينت شئيلري، تونج اشيالار و قديم سيلاحلار ييغيلميشدي. اوفيسيانت نظرده توتدوغو شئيلري گؤتور- قوي ائديب آلماق ايستهدييي موددتده آنتونيو ساکيتجه کناردا دورموشدو. آليجي پنجرهنين يانيندا دايانميشدي. يوخاري قالخميش اليندن مونجوغون ساپي ساللانيردي. باشي قاريشيق اولان اوفيسيانتين مودافيعهسيز اولدوغونو آنتونيو ايندي درک ائتدي و ايلک دفه ايکيليکده بير اوتاقدا اولدوقلاري بير آندا اونو سانکي يوخودان آييلتدي، رقيبينين حياتي ايندي اونون الينده ايدي. همين آنداجا اونون الي بيايختييار پيشتاختا اوزرينده اوست- اوسته ييغيلميش جير-جيندير آراسيندا موناسيب سيلاح آختارماغا باشلادي. لاکين داخيلينده هانسي بير قووه سه اونون بئينينده کي بو آني فيکيردن داشينماغا سؤوق ائديردي. آخي هر شئي يولونا قويولموشدو. صاباح او، بو شهردن کؤچوب گئدهجک و بو آدامي بير داها گؤرمهيهجکدي. يوخ، آشنا، دئمزسن مي آلداتديم؟
آنتونيو الينه کئچن قديم بير تاپانچانين اؤلوم ساچان بير آلت اولدوغونو خياليندان کئچيردي- باخ بئله- و آغير-آغير تاريخين پاسلي ياديگاريني الينه آلدي. باش بارماغي ايله چاخماغي آشاغي چکدي و تاپانچانين اوتوز ايلده ترپنمهيهن يايي مؤحکم سيخيلماغا باشلادي. «باخ بئله!»- دئيه آنتونيو اونون نييتيندن خبرسيز اولان، اووللر بير دفه اؤلدورمک ايستهدييي اوفيسيانتي نيشان آلاراق اؤزو-اؤزونه پيچيلدادي. و تتييي چکدي.
کيچيک اوتاغي گورولتو بورودو. لولهدن آلوو ايلديريم کيمي باييرا شيغيدي. گنج اوفيسيانت اوولجه شوشه وازلارلا[7] و قدحلرله دولو اولان پيشتاختانين اوزرينه سريلدي، سونرا ايسه سوروشوب دؤشهمهيه دوشدو. الينده داغيلميش سيلاح اولان، دايانيب پوليس گلهنهدك قيشقيران آنتونيونون سسي اوتاغي باشينا گؤتورموشدو.
