حليمه گؤزلريني آچان کيمي پنجرهيه باخدي، گؤردو کي، شوشهلرده غريبه-غريبه ناخيشلار وار. قالخيب پنجرهيه ساري گئتدي، دوزو-دونياني دوم-آغ گؤردو، معططل قالدي. دوزو-دونياني دئيهنده کي، گؤزونه گؤرونن آلچاق-آلچاق، ايريم-اويروم تپهليکلره دوشموش شهردي، شهرين ايري-ايري، اوجا-اوجا ائولريدي، کؤندهلن-کؤندهلن، دؤنگهلي-دؤنگهلي يوللاريدي.
قاري گؤرهن کيمي اوشودو، زرخارالي خالاتينا بورونوب:
- آا، قار،-دئدي.
قارين ياغماسيندانديمي، نه ايديسه سسي چوخ گور چيخدي.
-آا، قار...
موراد اويانمادي، چونکي يوخوسوندا قار ياغيردي، ائله بيلدي، آروادي حليمه خانيم دايوخوسوندان دئيير،- آا، قار...
يوخوسونا قار ياغديغي اوچوي يورغانا ائله بورونموشدو کي، بيرجه بورنونون اوجو گؤروکوردو. حليمه خانيم ييرغالانا-ييرغالانا گلدي بارماغيني بير-ايکي کره ارينين بورنونا ووردو:
- قار ياغير، مورادجيک!
آمما مورادين يوخوسو شيرين ايدي... دايانميشدي پنجرهنين آغزيندا، کوچهيه تاماشا ائلهييردي. کوچهده ده بهيبالانين، بهيميرزه نين، آتوببانين اوغلانلاري قار-توپو دوزهلديب، دوشموشدولر قونشو قيزين اوستونه . اؤزوندن اوتوز ياش کيچيک اولسادا مورادين او قيزدا گؤزو واردي.
- قار ياغير، آي موراد!
حليمه خانيمين سسي کوچهدن گليردي، آمما موراد نه قدر بويلانيرديسا گؤره بيلميردي. حليمه خانيمي گؤرمک اوچون موراد گرک اويانايدي، اونو اوياتماق اوچون ده بهيميرزهنين، بهيبالانين، آتوببانين اوغلانلاري قيزي بوراخيب گرک مورادين اوستونه دوشهيديلر.
حليمه خانيم گؤردو يوخ، موراد اويانان دئييل، يان اوتاغا کئچدي. اوغلو دا آتاسي کيمي بورمهلهنيب اوزو ديوارا ياتيردي. گلين اوياق ايدي. گؤزلريني ديوارا زيللهييب باخيردي، ائله بيل آخشامنان گؤزلري بئلهجه آچيق قالميشدي. حليمه خانيم آياقلارينين اوجوندا ياخينلاشدي.
- قار ياغير، لئيلي، خبرين وار؟
لئيلاياواشجا-ياواشجا باشيني دؤندهردي:
-قار؟
- بير قالخ دوز-دونيا آغاپپاق اولوب،-دئدي، پنجرهيه ساري گئديب تزهدن کوچهيه باخدي. داياناجاقدا چوخلو آدام واردي، اوزلريني قار توتان سمتدن دؤندرميشديلر، چييينلريني ييغيب اؤزلرينه دالدئيليک ائلهميشديلر.
لئيلادا قالخيب پنجرهيه ساري گلدي. ائولرين باشي اوستونه سپيلمکده اولان قارا باخدي، دينمهدي، قايناناسينين زرخارالي خالاتيننان اولان خالاتينين ياخاسيني ييغدي، حليمه خانيم اونا تاماشا ائلهمکده ايدي. آمما بو باخماق قاينانا باخماغي دئييلدي، تاي-توش باخماغيدي. لئيلانين ياراشيقلي بدنينده ائله گيزلي بير سيرر واردي کي، بونو بو ائوده يالنيز حليمه خانيم دويابيلردي، دويدو دا. لئيلا آليشيب سونرادا قور باغلاميش اوجاق يئرلرينه بنزهييردي، ساريمتيل-ساريمتيل کؤزرمکدهيدي. يوخوسوزلوقدان داهادا قاراليب، بؤيوموش گؤزلرينه ياراشان بير کدرله يورغانا بورمهلنميش رافيقه باخيردي. حليمه خانيم اونون آغاپپاق، دولو قوللاريني سيغاللادي، ياريم-آچيق، ايري دؤشلرينه باخدي، اونو دا حيسس ائلهدي کي، بو دؤشلر قوجاقلانماق ايستهيير، گولومسهدي، ائله بو گولومسهمهييله ده بوتون دئمک ايستهديکلريني دئيه بيلدي. اؤزونون ده بيردن-بيره اورهيينه بير ايستيليک چؤکدو.
- قادين نازينان اويناماق بوننارا يازيلماييب-دئدي،-يوخون قاچار، سونراهئچ ياتابيلمزسن، ياتابيلمهينده کيتاب اوخو.
لئيلا«ائئح!» ائلهدي، دؤنوب تزهدن کوچهيه باخدي، قار ياغماغيندايدي، آمما قارين بئله ياغماسي لئيلاني اوشوتمهدي، لئيلا بئلهجه ياري-چيلپاق قارين اوستونه اوزانماق ايستهدي.
حليمه خانيم اوتاقدان چيخدي، رافيقين يانيندان کئچنده اليني ياواشجادان اونون کورهيينه ووردو:
- دور، اوغول، دور-دئدي.
آمما رافيقدن هئچ سس-سمير چيخمادي. کئچيب مورادي سيلکهلهدي.
- قالخ داا، نولوب بوننارا، آي بالام؟
مورادين يوخوسوندا اؤزوندن اوتوز ياش کيچيک قيزي قار-توپونا توتموشدولار. قيز آغلاييب قيشقيريردي، آتوببانين اوغلونون آتديغي قار توپاسيندان بيري ده مورادا ساري گلمکدهيدي. موراد ايستهييردي قاچسين، آمما باجارميردي، يوخودا اولسادا باشا دوشدو کي، بيرجه يول وار، او دا اويانماقدي. اويانابيلميردي کي، حليمه باشلادي اونو سيلکهلهمهيه . يورغاني باشيننان آتدي، گؤزلريني آچيب آروادينا تاماشا ائلهمهيه باشلادي.
اؤزوندن اوتوز ياش کيچيک اولان قيز ياواش-ياواش دؤنوب زرخالاتلي حليمه خانيم اولدو.
- قار ياغير ائي، بير دور باخ!
مورادين يوخوسو يادينا دوشمهدي، ها فيکيرلشدي کي، به ، بو قار مسلهسي نه مسلهدي کي، اونا بئله تانيش گلير. ديکهليب پنجرهيه باخدي:
- نولوب؟
- قار ياغير.
- يوخ، اشي؟-دئدي، قالخيب پنجرهدن بويلاندي، داياناجاغا توپلاشماقدا اولان آداملارا باخدي، بهيبالانين، بهيميرزهنين، آتوببانين اوغلانلاريني آداملارين آراسيندا گؤردو، پاپاقلارينين قولاقلاريني ساليب سيقارئت چکيرديلر. يوخوسو يادينادوشدو، دؤنوب:
-بيليرديم-دئدي.
بو هئچ نهيين جاوابي دئييلدي، اونا گؤره ده حليمه خانيم فيکير وئرمهدي، کئچيب قازي يانديردي، سونرادا يان اوتاغا کئچدي، ديوارين بيري بويدان-بويا آکواريوم ايدي، باليقلار حليمه خانيمي گؤروب قويروق بولايا-بولايا قايناشيرديلار، ييغيشيب شوشهيه بورون وورماغاباشلاديلار، حليمه خانيم باليقلارا يئم تؤکدو، قاييديب مورادين يانينا گلدي:
- اوشاق نئجه گئدهجک ايشه -دئدي-بو قاردا؟
موراد ايري گؤودهسيله گوزگونون قاباغيني توتموشدو،
دؤندو:
- يوخ، گئتمهليدي، گؤردون کي، ايشه دوزهلنده نهلر چيخدي اورتايا، اؤزونو گؤسترمهليدي. بئله قاردا يوخاريدان فيکير وئريرلر کيم گليب، کيم گلمهييب.
رافيق اويانميشدي، قالخيب ائو پالتاريني گئييندي، هلهده پنجرهنين اغزيندادايانميش، شهرين قارلي کوچهلرينه بنزر بياض بدنلي لئيلايا باخدي، باخان کيمي ده اونون گئجه يارييا دک اوزونده-گؤزونده گزن يوپ-يومشاق اللريني خاطيرلادي. قالخيب لئيلاني قوجاقلادي، سويوق-سويوق، يوموشاق-يوموشاق اؤپدو. لئيلانين ايري کيرپيکلي گؤزلري گئنيش-گئنيش آچيلاراق رافيقه باخدي. گؤزلري سؤزله ، گيلئيله دولويدو. رافيق:
- يورولموشدوم، عزيزيم-دئدي-پاپادا يئر تاپدي، الدن دوشورم-دئدي، يئنه اؤپدو. لئيلا«ائئح» دئييب اوزونو يانا چکدي.
حليمه خانيم قاپيني آچدي، رافيق دؤندو: -ماما، نولوب بونا يئنه ؟-دئدي. رافيقين بئله دئمهيينه حليمه خانيم دا حيرصلندي، آمما اوزه وورمادي.
- تئز اول، ايشه گئتمهليسن.
بؤيوک اوتاقدا سحر يئمهيينه ييغيشديلار. آتا-اوغول اوز-اوزه اهيلهشديلر، يانلاريندادا خانيملاري. سوفره ده نه دئسن واردي، آمما حليمه خانيم يئنه سوفرهيه گؤز گزديردي، قالخيب ايري، خروستال قاب گتيردي، قويدو ايستولون اوستونه ، فينديق ايچيايدي، قوز-بادام لپهسيايدي، اوتوردو، گولومسهييب اريني ديرسکلهدي:
- يئ!
موراد دينمهدي، معنالي-معنالي حليمه خانيماباخدي-«هيي» ائلهدي، لپهدن بير-ايکي دنه آتدي آغزينا، حليمه خانيم گولمهييني ساخلاييب:
- بو گون بونون هاميسيني يئيهجکسن،-دئدي،-سونرادا اوغونوب گئتدي. لئيلانين دا دوداقلاري قاچدي، گولومسهدي. موراد کاغيذ گؤتوروب آغزيني سيلدي، حليمه خانيما ساري دؤنوب باشيني ايدي، قولاغينا نه سه پيچيلدادي:
رافيق پنجرهيه باخا-باخا:
- نئجه گئديب چيخاجام ايشه ؟-دئدي.
موراد دوروخدو، يئريندن ديکهلدي:
- نولور، اولسون، گئتمهليسن، يوخاري گتيردهجم سني. ايش اولدو، ايجلاس اولدو، ييغينجاق اولدو، اورا-بورا وور، گؤستر اؤزونو، بيلدين؟
قالخديلار، پنجره دن باخماغا باشلاديلار. قوم ماشينلاري يوخوشلار بويو قوم سپهلهييردي، آمما قار قومدان چوخ ياغديغي اوچون يوللار تزهدن آغاريردي.
قاپينين زنگي چاليندي. رافيق گليب گؤزلوکدن باخدي:-پاپانين شوفئريدي-دئدي-قاپيني آچدي. مورادين سوروجوسو قارايانيز، بويلو-بوخونلو بير اوغلان ايدي، بير الينده زنبيل، بير الينده ده بئش-آلتي تندير چؤرهيي ايچري کئچدي، چييينلريني يونگولجه ترپهديب اوستونون قاريني تميزلهدي.
حليمه خانيملا لئيلا قاپييلا اوز-اوزه ايديلر، دينمز-سؤيلهمز سوروجويه باخيرديلار. موراد گئري دؤنمهدن:
- نه دي، اه گتيردييين؟-دئدي.
- بازارليق ائلهميشم بير بالاجا-دئييب گولومسهدي،اوزو-گؤزو ائله ايشيقلاندي کي، حليمه خانيم يئرينده قوردالاندي. لئيلاباشيني آشاغي ساليب گؤزلريني سوفرهيه ديکدي. حليمه خانيم سوروجونون ياراشيغي قارشيسيندا يئنه سيخيلدي، اورهييندهجه:
- اؤلهسن سني-دئدي.
سونرايورغون-يورغون لئيلايا ساري دؤندو:
-قالخ-دئدي-چؤرهيي آل اونون اليننن.
لئيلاباشيني داقالديرمادي:
- اللاه ووروب اونو!
آمما سوروجونون تبسسومو لئيلانين دا خياليندايدي. لئيلا اونو دا بيليردي کي، دونيادا هئچ کسه تبسسوم بئله ياراشمازدي. قالخيب آکواريوما ساري گئتدي، باليقلار حليمه خانيمين آتديغي يئملردن يئييب اويون چيخاريرديلار.
باليقلارا باخاندا لئيلانين هئچ واخت يادينا دوشموردو کي، باليقلار اوچون دنيزلر وار، چايلار وار. چونکي گؤزلريني آچاندان اؤز ائولرينده ده ، اؤز خالي-خالچالي ديوارلاريندا دا بئله آکواريوم گؤرموشدو. بئلهجه-بئلهجه باليقلار گؤرموشدو کي، دنيزلردن، چايلاردان، خبرسيز يئييب-ايچن کيمي راحاتجا-راحاتجا اويون چيخاردا بيليرديلر.
پنجرهيه ساري گئتدي، قار ياغماقدايدي، کوچهده چييين-لرينه قار ييغيلميش کيشيلر واردي، بير نئچهسي اللرينده قارتوپو اويناديردي. لئيلا کوچهنين او باش بو باشيناباخدي کي، گؤرسون قيز وارمي. اللريني پنجرهنين سحردن ناخيشلانماقدا اولان شوشهسينه قويدو، اوووجلاريندان جانينا سرينليک آخدي، دوداقلاريني دا سيخدي شوشهيه.
کوچهنين او باشيندان ايکي قيز چيخدي، چييينلرينه قار ييغيلميش کيشيلر، قيزلارين ياخينلاشماسيني گؤزلهيه بيلمهديلر، قار توپالاريني آتديلار. قيزلار سومکالاريني باشلارينا توتموشدولار. هر ياندان اوستلرينه قارتوپو ياغيردي. مورادين سوروجوسو ائودن چيخيب قيزلاري گؤردو، او دا قيزلاري قارتوپونا توتدو. لئيلانين جاني قيزلارا دهيهن او قارتوپالارينين آغريسيني دويدو. ايستهدي کي، ائله بئله جه او دا کوچهدن کئچهيدي، مورادين سوروجوسو، چييني قارلي کيشيلر اونو قارتوپونا توتايديلار.
ائله بيل بوغازيندا نهسه قالميشدي، اودغوندو، آمما بونون قهر اولدوغونو بيله بيلمهدي، اوزونو پنجرهدن دؤندهردي. رافيق اوناساري گليردي، تلهسيک ياخينلاشيب لئيلاني اؤپدو:
- گئتديم،-دئدي.
حليمه خانيم اونون پالتوسونو توتدو.
-يولدا-ايزده ائحتيياطلي اول،-دئدي،-آدديم-آدديم سور ماشيني. رافيقين ياديندا هئچ نه يوخ ايدي. لئيلانين گيلئيلي-گوزارلي گؤزلري ده ياديندادئييلدي. هئچ نه حاققيندا فيکيرلشميردي، پيللهکنلري ائنيب آچاري چيخارتدي، قارا«وولقا»نين قاپيسيني آچدي، راحاتليقلا:
-گئتديک،-دئدي-جئيران.
آمما«جئيران» يئريندن ترپهنمهدي، قارين اوستونده ائشهلهنيب ييرغالاندي. رافيق ها چاليشدي، بير شئي چيخمادي. باشيني قالديريب يوخاري باخدي، گؤردو موراد دا، حليمه خانيم داپنجرهدن تاماشا ائلهييرلر. ماشيني بير ده ايشه سالدي، يئنه يئريندن ترپهده بيلمهدي. چيخيب حيرصله قاپيني اؤرتدو، ائله بيل قاري تزه دن گؤردو، ايندي آغلي کسدي کي، قار ياغير. تزه دن ائوه قالخدي، حليمه خانيم قاپيني آچدي. رافيق چييينلرييي ييغيب سوروشدو:
- نئينيييم، ماما؟
حليمه خانيم دؤنوب موراداباخدي:
- بلکه هئچ گئتمهيه؟
موراد اوول اللريله «يوخ» دئدي، سونرادا برکدن:
- يوخ، يوخ، گئتمهليدي، موطلق يوخلاياجاقلار. بير آز فيکيرلشدي، باشيني قالديريب:
-آوتوبوسنان گئت-دئدي.
رافيق تعججوبله آتاسينا باخدي:
- نه اينن؟
- آوتوبوسنان.
- هانسي آوتوبوسنان؟
موراد دوروخوب اليني پنجرهيه ساري اوزاتدي:
- راحاتجامين چيخ گئت. بو داها آد دي چيخار کي، مورادين اوغلو بو قاردا-چووغوندا آوتوبوسنان ايشه گئتدي.
رافيق چييينلريني چکدي:
- من نه بيليم آخي، نه گئدير اورا؟
موراد دا بير آز فيکيرلشدي، دؤنوب آرواديننان سوروشدو:
- حليمه ، نه گئدير اوياننارا؟
حليمه خانيم الي اوزونده آلتدان يوخاري مورادا، سونرادا رافيقه باخدي:
- واللاه بيلميرم، هئچ فيکير وئرمهميشم،-دئدي.
لئيلاياساري دؤندو، لئيلاقوللاريني دؤشلرينين اوستونده چارپازلاييب باليقلارا تاماشا ائلهييردي، ائلهبيل کيميسه گؤزلهييردي، آمما اؤزونون ده خبري يوخ ايدي کي،کيمي گؤزلهيير. حليمه خانيم سوروشدو:
- ليلي، بيلميرسن اوياننارا نه گئدير؟-دئدي.-تئز ده اؤز-اؤزونه جاواب وئردي-بيلمز اششي، هاردان بيلسين.
لئيلاکوسکون-کوسکون ديللهندي:
- اونو بيليرم کي، بو تروللئيبوس رئستورانين يانيننان کئچير. دايانيب گؤزلهييرديک، پاپانين شوفئري گليب چيخمادي، مينديک تروللئيبوسا، ائله ياخشييدي، ائله بيل تئاترداسان، هامي بيزه باخيردي.
لئيلانين دوغرودان-دوغرويا کئفي آچيلدي. اونونجو صينيفده اوخودوغو واختلاري خاطيرلادي. قيوريم ساچلي، دنيز گؤزلو اوغلاني خاطيرلادي.
...آناسي لئيلاني بزهدي-دوزهدي، اوستونه گول ياغي سپدي.
- گئت،-دئدي-گئجيکمه!-سونراداپنجرهدن سئوينجلهمي، کدرله مي، حسرتله مي، نهسه چوخ غريبه بير حيسسله ، نفسي تنگييه-تنگييه قيزينين آردينجا باخدي.
دنيز گؤزلو اوغلانلا لئيلا بير آغاجين ديبينده اوتوردولار. کؤز کيمي دوداقلاريلا لئيلاني اودلو-اودلو اؤپدو. يالنيز او اؤپوشلر لئيلانين ياديندايدي. لئيلا باشقا هئچ نه خاطيرلايا بيلمهدي. بيردن-بيره اهييلدي، از قالدي، بوتون قاب-قاجاقلاري، مورادين، رافيقين، حليمه خانيمين باشينا ياغديرسين، پنجرهلري، آکواريومو سينديرسين.
تلهسيک اؤز اوتاغينا کئچدي. موراد، رافيق، حليمه بير-بيرينه قاريشميشديلار. هرهسي بير سؤز دئييردي. موراد خئيلي فيکره گئتدي، سونرا رافيقه باخدي:
- بو بويدا شهرده سن، ماشيننان ائله دن-ائله گزيرسن، بئلهدن-بئله، هله بيلميرسن ايش يئرينه نه گئدير.
رافيق اؤزوندن چيخدي:
- هاردان بيليم من؟ نهييمه لازيمدي بيلم؟ سن مننن قاباق شهردهسن، سن نييه بيلميرسن؟
موراد تئلئفونا ساري گئتدي، نومرهني ييغدي.
-آللو، يولداش سليم، صاباحين خئيير... بوراباخ، رافيق ايشدن قاليب، بيلميرسن اوياننارا هانسي آوتوبوس گئدير، کندچيسن، دئييرم، بلکه يادينداقالدي؟
- سن اؤل، موراد، بيرينجي دفهدي مننن بئله شئي سوروشورلار. بيلميرم، جانين اوچون، يوخسا دئيهرديم. بيليرديم، آمما هاميسي دهييشيب آوتوبوسلارين. بئله چيخير کي، ماشين آلتيميزدان گئتسه ، ائويميزي تاپابيلمهريک، هي... هي... هي... آمما «کندچيسن»ي يامان دئدين.
موراد حيرصلنميشدي. ايستهدي يولداش سليمه آغزيندان چيخاني دئسين، آمما يولداش سليمين بؤيوک قوللوقدا ايشلهيهن قايني بارماغيني سيلکهلهيه-سيلکهلهيه مورادين گؤزلرينين اؤنونه گلدي. اونا گؤره ده مورادين سسي ايچينه دوشدو، ناپ-نازيک بير سسله:
- ياخشي، ياخشي، يولداش سليم-دئدي-چوخ ساغ اول، باغيشلا، اذيييت وئرديم.
دستهيي قويان کيمي ائوي باشينا گؤتوردو:
- ناکيشي کؤپهياوغلو، قودورماغينا باخ، چاناغيندان چيخماغينا باخ! «کندچيسن» سؤزوننن خوشو گلمير داها، اوز-گؤزونو بوزوشدوروب سليمين آغزيني اهيدي-«کندچيسن»ي يامان دئدين. -آرواد حئسابينا آدام اولان قورومساق.
حليمه خانيم گؤردو، موراد کيشيلهنيب چيخيب اؤزوندن، اونو دا گؤردو کي، بو کيشيلنمک هئچ ياراشمادي ارينه ، ساکيتجه ديللهندي:
- ياخشي، چيخما اؤزوندن، ايندي بيري قاپيني آچار، بو سؤزلري قايتاريب سنه دئيهر.
موراد دستهيي گؤتوروب نومرهلري ييغدي:
- آللو، فاضيل يولداش، صاباحين خئيير، هه ، ائله بئله ، خئييردي، ناراحات اولما. بيزيم رافيق ايشدن قاليب، بيلميرسن؟..
لئيلا ديوانين اوستونه اوزانميشدي. قايناتاسينين سسيني ائشيديردي، آمما بيلميردي نه دئيير. تپهدن ديرناغا آليشيب يانماقدايدي، ايستهييردي ائله بئلهجه قارين اوستونه اوزانسين.
قايناتاسينين ائنلي کورکلي، ايري اللي، سوروجوسو خياليندا گولومسهمکدهيدي، سحردن فيکريندن قووماغا چاليشيردي، «آللاه ووروب اونو...» بئش-آلتي ايل قاباق کؤزرميش دوداقلاريلا اونو اودلو-اودلو اؤپن دنيز گؤزلو اوغلاني فيکيرلهشمک، خاطيرلاماق ايستهييردي، آمما سوروجو گليب دايانيردي گؤزلرينين قاباغيندا. ايستهييردي رافيقي خاطيرلاسين، بير آنين ايچيندهجه رافيق ده دؤنوب انليکورکلي ايري اللي سوروجو اولوردو.
لئيلا داها دؤزه بيلمهدي، سوروجونون ايري اللري آغ بدنينده گزمهيه باشلادي. بو ايري اللرين هر بيري بير آدام گوجويله لئيلاني باغريناباسدي. لئيلانين هئيدن دوشموش قوللاري سوروجونون بوينونا دولاندي، قيزغينليقلا، آجيقلا اونون گؤزل تبسسوملو دوداقلاريني اؤپدو.
لئيلانين ايري، قاراگؤزلري گئن-گئن آچيلاراق، کيرپيک ترپهتمهدن، دونيانين سسيندن-کويوندن خبرسيز هاردانسا اؤز-اؤزونه تاماشا ائلهييردي.
يان اوتاقدان مورادين سسي گلدي:
- آللو، زکي سنسن، هه ؟ نئجهسن؟ رافيق ماشيني حيطدن چيخارا بيلمهدي، هري، هري، بيلميرسن او ياننارا هانسي آوتوبوس گئدير؟ يوخ؟ اي سنه نه دئييم!..
لئيلانين خياليندا هر شئي بير-بيرينه قاريشدي،اهييليب دؤشلرينين اوستونده چارپازلانميش اؤز قوللاريني گؤردو. اؤز هيچقيريقلاريني ائشيتدي، گؤردو کي، آغلايير. سوروجونون ايري اللريني تزهدن خاطيرلاماق ايستهدي، آمما هئچ نه چيخمادي، بيرجه اونو گؤردو کي، سوروجو سبت الينده دايانيب قاپينين آغزيندا اؤز گؤزل، ياراشيقلي تبسسومويله گولومسهيير...
لئيلانين هيچقيرتيسيني ائشيتديلر. حليمه خانيم آجيقلي-آجيقلي رافيقه باخدي. رافيق بويونا-بوخونونا ياراشمايان بير اوشاقليقلا چيينيني چکيب اللريني اويناتدي.
- نئينهميشم من؟
حليمه خانيم لئيلانين اوتاغينا ساري گئتدي. لئيلا ديواندا اوزانميشدي. اؤزو ده دؤشلريني قوجاقلاييب، گؤزلريني يومموشدو، ايچيني چکه-چکه هيچقيريردي. ايستهدي او دا لئيلايا قوشولوب آغلاسين، آمما گولومسهدي، گليب لئيلانين قولوندان توتوب قالديردي:
- گئيين، گئيين-دئدي-هاوايا چيخاق.
رافيق آز قاليردي ائودن باش گؤتوروب قاچسين. لئيلانين اللريندن، گؤزلريندن قورخوردو، آغلاماغيندان قورخوردو. لئيلانين گؤزلرينه ، اللرينه، آغلاماغينا جاواب وئرمک لازيم ايدي. بو حاقدا فيکيرلهشنده همهشه رافيقين يادينا سيييرمهلرده کي تاخچالارداکي قالاق-قالاق پوللار دوشوردو. آمما بو پوللار لئيلانين گؤزلرينه، اللرينه، آغلاماغينا جاواب وئرمکده گوجسوز ايدي، گرکسيز ايدي.
حليمه خانيملا لئيلا گئيينيب-کئچينيب چيخديلار. موراد يئنه اؤز ايشيندهيدي، نومرهني ييغيب:
- آللو،-دئدي،-سپرآووْچني؟ گؤزل قيز، سالام! قارنان نئجهسن؟ عجب تميزليکدي. بوراباخ، دئ گؤروم ماشينقاييرما زاوودونا هانسي آوتوبوسلار گئدير؟ اوتوز دؤرد؟ بيزيم يانيميزدان کئچير! هه، هه ، اولدو، ياخشي...
...اتوببايين، بهيميرزه نين، بهيبالانين اوغلانلاري يئنه دايانميشديلار تينده، اللرينده ده قارتوپو، کوچهنين او باش بو باشينا باخيرديلار.
حليمه خانيم، لئيلا، رافيق بينادان چيخديلار.حليمه خانيم رافيقين قولونا گيردي. داياناجاقدا کي چييينلري قارلي کيشيلر اللرينده کي قار توپالاريني گيزلتديلر. حليمه خانيمگيلين ياشاديغي بيناني تانيييرديلار، ياخشي بيليرديلر کي، بو بينادا ياشايانلارلا ظارافات ائلهمک اولماز. بير يئرده رافيقين آياغي سوروشدو، ياني يئره دهيدي، قالخيب برک-برک آناسيندان ياپيشدي. چييني قارلي کيشيلر اؤزلريني گؤرمزلييه ووردولار. اوتانا-اوتانا يئره باخديلار. اتوببا-نين، بهيميرزهنين، بهيبالانين اوغلانلاري قاچيب تيني بورولدولار، قارينلاريني توتوب اوغونوب گئتديلر.
رافيق آوتوبوسا ميندي، جاماعات اونو ايتهلهيه-ايتهلهيه اورتايا آپاردي. حليمه خانيم پنجرهدن قيشقيردي:
- کوندوکتورا دئ، کئچيب گئدرسن، تاپابيلمزسن، تاپشير کوندوکتورا.
آوتوبوس ترپهندي، آغير-آغير شهرين قارلي، قوملو يولويلا قالخدي.
لئيلادايانميشدي، سويوق-سويوق کيشيلره باخيردي، دلي بير ايستکله قارتوپو ايستهييردي. آمما اورکله ، کيشي کيمي باشيني قالديريب باخان يوخ ايدي. چييني قارلي کيشيلرين هاميسي بو بينانين، بو گؤزل، ياراشيقلي خانيملارينا قوللوق گؤسترمک ايستهييرديلر. بهيبالانين، بهيميرزهنين، اتوببانين اوغلانلاري تيندن باشلاريني چيخارتديلار. بير-بيريندن سئچيلمهيهن بو خانيملارا اوغرون-اوغرون، يانيقلي-يانيقلي تاماشا ائلهمهيه باشلاديلار.
لئيلانين گؤزلري ييغيلميردي، اوندا-بوندايدي. بهيبالانين اوغلو اتوببايين اوغلونا ساري دؤندو:
- عليپاشا، نه آختارير، اله او؟-دئدي.
داياناجاقداکيلارين آراسيندا ايري گؤودهلي بير اوغلان دايانميشدي، پئنجهييني ياري آرالاييب بير قيزي قوينونا قويموشدو. لئيلا اوول ائله بيلدي قاييناتاسينين سوروجوسودو، سونرا گؤردو کي، يوخ. حليمه خانيماساري دؤندو:
- اونلاراباخ!
اورهيينه غريبه بير ايستيليک چؤکدو، سونرا بو بير دامجي ايستيليک بوتون بدنييي گزدي، حليمه خانيم دا دؤنوب باخدي. لئيلانين اورهيينه دامان ايستيليکدن اونون دا اورهيينه ياييلدي. قيز ائنلي کورکلي، گئنسينهلي اوغلانين پئنجهيينين ياخاليغيندان باشيني چيخارتميشدي، غريبه اوزو واردي، بختهورليکله گولومسهييردي. سونرا شوبالي، گئييملي-کئجيملي گؤزل خانيملاري گؤردو، ائلهبيل بيردن-بيره اوشودو، اوغلانين سينهسينه سيخيلدي، بيرجه گؤزلري گؤروندو.
قار هله ياغماغيندايدي، قوم ماشينلاري يوللارا قوم الهييردي...
