سكيدن ائنيب آرخايا بير نئچه آدديم آتاندان سونرا كوچهنين دوز اورتاسيندا دايانيب اللريمي آغزيما آپارديم و بينانين يوخاري مرتبهلريندن بيرينه باخاراق قيشقيرديم:
-تئ – رئ - زا!
آيدان هوركمهيه[1] باشلايان كؤلگهم، گليب آياقلاريمين آراسينا قيسيلدي[2].
يانيمدان بير نفر كئچيردي. من تزهدن قيشقيرديم:
تئ – رئ – زا!
همين شخص منه ياخينلاشيب:
- سسيني يوكسلتمهسن او، سني ائشيتمهيهجك!-دئدي.- گل بير ده بير يئرده قيشقيراق، گؤرك نه آلينير؟! بير- ايكي- اوچ دئيهن كيمي ايكيميز بيردن «تئرئزا!»- دئيه قيشقيراق.
« بير ، ايكي، اوچ، »-- دئيهن كيمي ايكيميز بيردن قيشقيرماغا باشلاديق:
-تئ- رئئئئئ – زااا!
چايخانادان يا دا تئاتردان چيخميش بير قوروپ دا بيزي گؤرن كيمي، «گلين بير يئرده چاغيراق،»- دئدي. كوچهنين اورتاسيندا اونلار دا قوشولدو، بيرينجي شخص بير- ايكي- اوچ دئيهن كيمي هاميميز بير آغيزدان قيشقيرماغا باشلاديق:
-تئ – رئئئ- زااا!
بير نفر ده گلدي و او دا بيزه قوشولدو، اون بئش دقيقه سونرا بينانين قارشيسينا ايييرمي نفر ييغشميشدي. غلبهلييين آردي- آراسي قطعيييهن كسيلميردي.
ايييرمي نفرين تك سسله قيشقيرماغي اولدوقجا چتين مسله ايميش. اوچ دئمهدن قيشقيران يا دا سوسمالي اولدوغو حالدا قيشقيران بير نفر اولوردو، آنجاق يئنه ده خئيلي اوغورلو [3] آلينيردي. ايلك هئجا اولان «تئ»ني قيسا و بم پردهده دئمهيييميز، ايكينجي هئجاني- « رئ»ني اوزاداراق قيشقيرماغيميزي، «زا»يا گلديكده ايسه تزهدن بم پردهدن چاغيرماغيميزي يئنه بيزه او، دئدي. بيرينجي منه ياخينلاشان. بئلهجه هره بير جور قيشقيرماياجاقدي ان آزيندان.
ائله آدام بالاسي كيمي قيشقيرماغا باشلاميشديق كي، برك قيشقيريقچي اولدوغو بيلينن، چيللي بير نفر اوزونو منه توتوب:
-سن دقيق بيليرسن قيز ائودهدير؟- دئيه سوروشدو.
-خئيير، دقيق بيلميرم.
-اولمادي دا. يقين آچاري ايتيرميسن؟
-دوزونو بيلمك ايستهييرسينيزسه، آچار بو ساعات دا يانيمدادير.
-ياخشي، بس اوندا نييه چيخميرسان يوخاري؟
-من بوردا ياشاميرام آخي.- دئديم.- ائويم شهرين او بيري باشيندادير.
-ياخشي، بير شئي ده سوروشاجاغام—دئدي همين چيللي كيشي ازيليب—بوزولهرك:- ياخشي، او ائوده بس كيم ياشايير؟
- دوزو دئييم كي، بيلميرم.
نهسه ائله بيل راضي قالماديلار بو جاوابيمدان.
- خاهيش ائديريك، دئيين گؤرك، بس نييه سحردن بوردا دايانيب « تئرئزا! تئرئزا!»- دئيه قيشقيريرسان؟
دانيشان آدام هر كيم ايديسه، مؤحكم عصبيلشميشدي. چونكي، سؤزلر ديشلرينين آراسيندان فيسيلداياراق چيخيردي.
- واللاه، منيم اوچون ائله ده فرقي يوخدور- دئديم- ايستهييرسينيزسه بير باشقا آد دا چاغيرا بيلهريك، حتتا بير باشقا بينادا تئرئزانين ياشاييب ياشاماديغيني دا اؤيرهنه بيلهريك.
آرتيق مسله گئت- گئده غليظلهشيردي.
-بيزي اله سالميرسان كي؟- دئيه چيللي كيشي شوبههلي بير ادا ايله.
- من سيزي نييه اله سالمالييام كي؟- دئديم اينجيميش بير سس تونو ايله. تصديقلهسينلر دئيه اطرافيمدا دايانان ديگر اينسانلارا باخديم. هئچ كيم هئچ نه دئمهدي، نيييتيمي باشا دوشمهميشديلر، بو حيسس اولونوردو.
ياشاديغيميز سسسيز، سيخينتيلي بير نئچه ثانييهدن سونرا آغير بير سس گلدي قولاغيما:
-باخ،-دئدي همين سسين صاحيبي- سونونجو دفه تئرئزاني چاغيريريق، سونرا دا هامي چيخيب گئدير ايشينين- گوجونون دالينجا.
ائله ده ائلهديك.
بير... ايكي... اوچ...
-تئ – رئ- زا!
آمما ائله ده ياخشي چيخماميشدي سسيميز. هامي چيخيب ايشينين- گوجونون دالينجا گئتدي.
من مئيدانا گليب چاتان آرخادا بيري هله ده قيشقيريردي:
-تئئ – رئئئ –زا!
اوردا دايانيب قيشقيريردي. كيم ايديسه، يامان عينادكار[4] خاصيييتي وار ايدي دئيهسن.
