بو گئجهده بوغولورموش كيمي خيريلدادي،يئرينده چيرپيندي ، حيسس ائلهدي كي، بوز كيمي سويوق بير شئي بالديرلارينا دولاندي، سونرا يايا دؤنوب فيرلانا – فيرلانا يوخاريلارا قالخدي، كورهيينده ، سينهسينده گزدي، ايلان تكين سارينيب بدنيني سيخدي و بيردن يوماقلانيب بوينونا دوشدو. او ، نه قدر اللشديسهده گئديكجه داراليب نفسيني كسن ، قيوريلا – قيوريلا بوينونو سيخان بو اوشوتمهلي سويوقلوقدان ياخاسيني قورتارا بيلمهدي، اليني اوزاداندا بيلكلريده كئييدي. چيرپيندي، يئرين ايچينده ائشهلندي و بيردن سكسكسه ايچينده گؤزلريني آچدي، تاوانا ، پنحرهيه بويلاندي. گؤردويو يوخونون واهيمهسي جانيندان چيخاندان سونرا باشا دوشدو كي ، اؤز ائوينده ياتاق اوتاغيندادير. اليني آلنينا چكدي. تر باسميشدي. بدني سو ايچيندهايدي. دويمهني باسيب ايشيغي يانديردي. يورغاني اوستوندن آتدي. ديققتله دؤشهيين اوستونه باخدي. بير آز بوندان اوول بدنينه دولانان قيزيل ايلانين سويوقلوغو هله جانيندان گئتمهميشدي. اونا ائله گليردي كي ، ايلان يورغان -دؤشهيين ايچيندن سوروشوب چارپايانين آلتيندا گيزلنميشدي. ايشيق سؤنن كيمي يئنه قاييداجاق . باشماقلاريني گئييندي. پنجرهنين اوستونده دهليزه چيخدي. گؤزو اوشاقلارينين ياتاق اوتاغينا ساتاشدي. پنجرهدن ايچري سولغون ايشيق دوشموشدو. همين ايشيقدا گؤردو كي ، اوغلانلاريندان بيري آغزي اوسته اوزانيب. آياقلاري تكجه يورغاندان دئييل، چارپاييدان دا كنارا چيخميشدي. او بيريسي ايسه ديزلريني قارنينا يغيب بوزوشموشدو. آخشامدان بؤيردو اوستو نئجه اوزانميشديسا ائلهجهده قالميشدي. داياندي. بالالاريني غيبطه ايله باخدي. بيليردي كي ايهر اونلاري اوياتماسان ، دوز گوناورتاياجان بئلهجه ياتاجاقلار. ايش اوتاغينا كئچدي. بورايا گلنده همهشهكي كيمي اؤزونو بير آز يونگول حيسس ائتدي. پنجرهني آچدي. شهرين ايشيقلاري سؤنسهده هاوا آيدين ايدي. دنيزين لپهلري ايشيلداييردي. نارگين[1] طرفدهكي ماياق[2] همهشهكي كيمي يانيب سؤنوردو. ساحيلده كي آغاجلار مورگولهييردي. كوچهلرده تكم – سئيرهك شوتويهن ماشينلارين تكر شيريلتيسيندان باشقا گئجهنين سوكوتونو هئچ نه پوزموردو...
اوشاقليقدا دا يوخولار گؤرردي. او واختين يوخولاري اينديكينه بنزهميردي. گاه كورون كيناريندا كي ديبسيز يارغانلاردان اوچار ، بييان كؤكوندن ياپيشيب سويون اوستونده هاوادا ساللانا قالار، گاه آت بئلينده مارال قوووب قولپونلاردان آتيلار، گاه قارا قوشون جايناغيندا گؤيه قالخيب بولودلارين اوستونده سوزهر ، گاهدا تپهسي اوسته آشاغي يووارلانيب قيژيلتي ايله يئره ديهردي. بو بلكه ده اولو اجدادلارينين چاغيريشي ايدي، اونو لاپ كئچميش ، ماغارالاردا ياشاديقلاري دؤورلره آپاريرديلار؟ بيلميردي. بيرجه اونو باشا دوشوردو كي ، اينديكي يوخولار بام-باشقادير. اؤزوده اونو يوخودا اوزاقلارا يوخ ، لاپ ياخينلارا ، دوننكي ، سيراغا گونكو واختلارا آپارارديلار. همهشه ده شهردن كنده قاييديردي، قوجا آتا- آناسينا باش چكمك ، اونلاري يوخلاماق اوچون بير نئچه گونلويه، آمما گئري قاييدا بيلميردي. گؤروردو كي ، كيشي لاپ الدن دوشوب، بالاجا بويو داها دا بالاجالاشيب، يوماغا[3] دؤنوب ، گؤزلرينين ايشيغي ضعيفلهييب ، اهيين – باشيدا تؤكولوب ،پالتارلارينين هاميسي نيمداشدير. اونون بو ساعات ايستي بير اوتاقدا تاختين اوستونده ، موتككهيه ديرسكلهنيب دينجهلمك واختيدير، گلين بويوروب نوه اويناتماق چاغيدير. آناسي دا الدن دوشموشدو. قالين يون شاللا بئليني كورهيينه قدر ساريسادا جاني ايسينمير، جييهرلرينه دهيهن تويوق ياخاسيندان ال چكمير، اوشويور تيترتمهلي بدني هئچ قيزميردي. ياز – ياي آيلاريندا بير تهههر دولانيرديلار، آمما قيشدا اذييت چكيرديلر، واختي–واختيندا اودون–اوجاقلاري دا اولموردو. چي كرپيجدن تيكيلميش ائوده پئچ[4] يانسادا ايچري ايسينميردي.
شوشه عوضينه پنجرهسينه قزئت توتولموش تورپاق دؤشهمهلي ائو بوزخانايا دؤنوردو. او بونلاري گؤروردو. اورهيينين باشي زوققولدايير، ايچريدن قوورولوب يانيردي. اورهييندن كئچيريردي كي ، آتا – آناسيني گوتوروب اؤزو ايله شهره آپارسين، اونلارين قوللوغوندا دورسون، هئچ اولماسا ايختيار چاغلاريندا بير آز اؤولاد چؤرهيي يئسينلر. آمما آپارمالي يئري يوخ ايدي. زامانين اوزو قارا اولسون، هلهده ياتاقخانالاردا كيرايه ائولرده اولوردو.
موحاريبهدن قاييداندان هئچ يانا گئتمك ايستهمهميشدي. اؤز كندلرينده قالماق، آتا – آناسينين يانيندا ،ايشلهمك قاپي– باجاني بئجرمك قرارينا گلميشدي.
آمما آتاسي راضي اولماميش ، « من هئچ ، عؤمرومو-گونومو پيس-ياخشي ياشاميشام.»دئميشدي، « بير تهههر دؤورانيميزي باشا ووراجاييق، آمما سن بورادا قالما، گئت مكتبيني قورتار. سنه قييميرام، گؤزومون آغ–قاراسي تكجه اوغلومسان. اؤزوده بيليرم كي ، اوخوماغين داليجا دوشسن، بير يانا چيخاجاقسان. بيزه باخما ، بيزيم دؤوران باشقا ايدي. ائل اوچون چاليشديق.» آناسي دا اونو ديله توتموشدو و او زامان ائله فيكيرلشميشدي كي ، جمعي اوچ – دؤرد ايله شهرده بينهلهشهجك، اؤزونه ائو- ائشيك دوزهلدهجك و آتا-آناسيني دا يانينا آپاراجاقدير. او ،خيالينا دا گتيرميردي كي ، ايللر بير–بيريني قوواجاق. آرزيلار اوركده قالاجاقدير.
يوخولار اونو كنده آپاراندا كنددهكي ائولرين قوزولاميش تورپاق دووارلارينا ، چوروموش پردهلره ،تاختالارا باخير و قورخوردوكي ، بير گون تاوان ياتا ، يادا سئللهمه ياغيش چيي كرپيچلري يويوب آپارا، قوجالار ائوين آلتيندا قالا و بوندان هئچ كس خبر توتمايا. بو قاريشيق فيكيرلردن بدني لرزهيه گلير و اونلاري دامين آلتيندا تك قويوب شهره گلدييينه پئشمان اولوردو. و اورهيينده اؤزونو يامانلاييردي كي ، سن آنجاق اؤزونو ،دوشونورسن. ايستهييرسن دولاناجاغين ياخشي اولسون، شهرده ال–آياغين قورو گزهسن. ياديندان چيخارديرسان كي ، اونلار سني بؤيودنه قدر نه ذيللت چكيبلر؟ كيرپيكلري ايله اود گؤتوروبلر، عزيز تيكهلريني يئمهييب سنه وئريبلر، ائله ايندي ده سندن اؤترو جانلاريني بئله فدا ائتمهيه حاضيرديلار، لازيم اولسا سينهلريني ياريب سني اورادا گيزلهدرلر...
او بو جور يوخولاردان سونرا بير نئچه دفه هر شئيي آتيب كندده قالماق ايستهميشدي. ايستهميشدي كي ، شهردهكي عئلمي ايشينيده ، يازي-پوزوسونو دا آتيب بورادا مكتبده ايشه دوزلسين، گئجه-گوندوز الـلهشيب آتاسينين گوذرانيني ياخشيلاشديرسين، آمما يئنه قوجالار راضي اولماميش ، اونو ديله توتوب يولا سالميشديلار.
غريبه ايدي شهرده ساكيت اولا بيلميردي. يوخولار اونو الدن ساليردي. اؤزوده همهشه كنده چاغيريرديلار.
بير دفه او دوغرودان دا كنده گلدي. آناسينين خستهلييي آغيرلاشميشدي. قاطارا بيليت آليب يولا دوشمزدن ايكي گون اوول يوخو گؤرموشدو: آناسي كؤهنه پالتارلاري يامايا–يامايا اؤز-اؤزونه گومولدنيب آغلاييردي. همهشهكي كيمي ديل دئييردي. قارداشلاري موحاريبهده ايتگين دوشندن سونرا بونا عادت ائلهميشدي. گاه گيزلينجه صانديغي آچيب شكيللره باخيب، آغلاييب گاه دا ائله – بئله نه ايسه يادينا ساليب ايچين – ايچين گؤينهييردي. يامان قارداشجانلي باجي ايدي. بلكه ده ائله بو سيزيلتيلار، قارداش حسرتي اونو ايچيندن يئييب بو حالا سالميشدي، خستهليك جانيندان چيخميردي.
ايچري گيرنده آناسيني يورغان – دؤشكده گؤردو. تاختين اوستونده ، اوزو پنجرهيه طرف اوزانميشدي. هاوا توتقون ايدي. چيسهلهييردي. سارالميش اوتلوغو دوغرايان جيغيرلار سوروشكنلشميشدي.[5] چلهلرين ديبي ائله قونوم–قونشويا گئدنلر آياقلاريني سويونموشدولار. اوشاقلار دانا- بيزوولاري قاباقلارينا قاتيب كندين اورتاسينا دوغرو آپاريرديلار. دئيهسن آناسي بونلارا باخميردي. گؤزونو يارپاغي تؤكولموش چينارلارين چيلپاق بوداقلاري آراسيندا قارالان قارغا يووالارينا زيللهميشدي، هئچ دؤنوب اوغلونا باخمادي. پئچين قاباغينا اوتوروب تئز – تئزاوجاغا اودون آتان آتاسي دا دينمهدي. آروادين اوزاغا گئتميش خياليني قيرماق ايستهمهديلر.
اونون دوداقلاري سهيريدي[6] ، چنهسينين عضولهلري تيترهدي. نه قدر چاليشديسا دا كيرپيكلريندن سوزولن ياشي ساخلايا بيلمهدي. دئيهسن آناسي بونو حيس ائتدي. چئوريليب باخدي و بيردن ديرسكلنيب و بيردن قالخماق ايستهدي. ايستهدي كي قولونو آچيب بير آز، يادلاشان اوغلونو باغرينا باسسين، اوشاق واختلاريندا اولدوغو كيمي . آمما داياندي. نه فيكيرلشديسه قوللاريني يانينا سالدي. اورهييندن نهلر كئچدييينين بيرجه آللاه بيلدي. آناسينين حوزنلو گؤزلرينده ايشارتي گؤردو، رنگينده قيزارتي. ائله بيل آرواد بير آزجا ديرچلدي.
- آ ، سن گلن يوللارا قوربان اولوم، نه ياخشي بيزي يادا سالدين، نئچه گون ايدي ائله گؤزوم يول چكيردي، سندن اؤترو لاپ بورنومون اوجو گؤينهييردي. دردين آليم قورخوردوم اوزونو گؤرمهيم، گورا الي اوزاليقلي گئدم.
- سنده نه وار كي ، اوشاغين اورهييني خاراب ائلهييرسن؟ - دئيه كيشي سؤزه قاريشدي.
- اوراسي ائلهدير، آمما نه بيليم گونده مين خيالا دوشورم، دونيا اؤلوم–ايتيم دونياسيدير.
آرواد سوسدو. بولانيق گؤزلريني اوغلونون اوزوندن چكيب چؤله باخدي. بير آزجا يانپؤرتو[7] اوزاندي دئيهسن ايستهيير دي كي ، گؤز ياشلاريني اوغلو گؤرمهسين. اودا ياشلا دولو گؤزلريني پنجرهدن اوتايا، چيلپاق قلمهلرين باشينا قونوب بوزوشدو. قارغالارا زيللهندي.
او گئجه آناسينين يانيندا اوزاندي. قويمادي اوجاق سؤنسون. تئز–تئز يورغاني چكيب آروادين كورهييني اؤرتدو. هردنبير ائحتياطلا اليني آناسينين آلنينا قويوب ايستيليييني يوخلادي. ائله بير شئي يوخ ايدي، آمما چتين نفس آليردي. گوزونو دولانديريب آتاسينا باخدي. كيشي اوتوردوغو يئردهجه باشيني ايستولا سؤيكهييب درين يوخويا گئتميشدي.
آنا-بالا ياتميرديرلار. نفسلريني ايچري ساليب، ساكيتجه بير-بيريني گؤزلهييرديلر. اوغول ايستهييردي كي ، آناسي يوخويا گئتسين. آنا دا اوغول ياتماميش راحات اولا بيلميردي. آرادا بالاجا چيمير ائلهدي[8] و گؤردو كي ، آناسي اليني اوزاديب اونون ساچيني سيغاللايير. دينمهدي، و گؤزلهدي و گؤردو كي بوندان سونرا آرواد دريندن نفس آليب يوخويا گئتدي. آرتيق ايشيقلاشيردي. پاييزين سون آيلارينا مخصوص توتقون ، چنلي – چيسكينلي ، غملي بير سحر آچيليردي.
ائرتهسي گونو آنا بير بالاجا ديرچلدي. دوروب اوغلونا خورك ده بيشيرمك ايستهدي. قويماديلار. اوغلو اونو باشينين آلتينداكي ياستيقلاري دوزهلتدي. اوستونو برك- برك اؤرتدو. آرواد راحاتلانيب پنجرهدن چؤله بويلاندي و بيردن دؤنوب اوغلونون اوزونه باخدي. سولغون دوداقلاري آستاجا ترپندي.
- اورهييم يامان آلما ايستهيير، بيرجهدنه اولسايدي يئيهرديم.
اوغول در حال آياغا قالخدي قاپيدان چيخماق ايستهينده آتاسي ديللندي.
- هارا گئديرسن ، بالا؟
- گؤروم كيمده آلما وار؟
- هئچ كيمده يوخدو، اؤزونو يورما ،اوغول.- تعججوبله آتاسينا باخدي. كيشي اونون گؤزلريندهكي سووالي اوخودو. - باغ-باغاتين كؤكو چوخدان كسيليب، بالا....
سوسدولار. اوغلان ائودن چيخدي. گؤودكجهسينين ياخاسيني قالديردي.. گؤزونو دولانديريب كنارلارا. يووالارينين يانيندا بوداقلارا قونوب قاريلداشان قارغالارا باخدي. آناسينين آرخاسينجا گلمهديييني يقين ائتديكدن سونرا، ائوين دالداسينا چكيليب پاپيروس يانديردي.
دوغرودان دا غريبه قانونلار وئريليردي. گاه باغ – باغچاني اؤلچوب آرتيق يئرلري كسيرديلر، گاه دئييرديلر مال – قارا ساخلاييب، گاهدا باغداكي هر مئيوه آغاجينا آيريجا وئرگي قويوردولار. او يادينا سالدي كي ، كندلرينده ائله باغلار واردي كي ، بو اوزوندن باخاندا او اوزو گؤرونموردو. ياز آيلاريندا مئيوه چيچكلرينين عطيريندن آدام مست اولوردو. چلهلرين اوستوندن اهييلن بوداقلارين چيچهيي يولا سپهلنيردي. اوشاقلار اللرينده چانتا ، آياقلارينين آلتينا سپهلنميش چيچكلرين اوستو ايله ايرهليلهيير ، باشلارينا چتير سرميش بوداقلارين آلتي ايله مكتبه گئديرديلر. بو كندين مئيوهسي آدينان ايدي . آرمودونون ، آلماسينين سوراغي هر يانا ياييلميشدي. سونرا بالتا گؤتوروب مئيوه آغاجلاريني دوغراديلار، وئرگينين درديندن قالانلاري دا موحاريبه واختي باخيمسيزليقدان تلف اولدو.
او، پاپيروسونو سوموروب آتدي و گؤيلره باش چكن بهرهسيز آغاجلارين بوداقلارينا باخدي. گؤدهكجهسينين ياخاسيني قالديردي، ياغيشدان سونرا سوروشكنلشميش جيغيرلا كند يولونا چيخدي. دوز آخشاماجان هر يئري آختاردي: رايون[9] مركزينه گئتدي، دمير يول استانسياسيني[10] الك –بلك ائلهدي، هئچ نه تاپا بيلمهدي. قارانليق قاريشاندا الي بوش گئري قاييتدي.
ايكي گوندن سونرا باكييا يولا دوشدو كي ، ايشدن ايجازه آليب اون–اون بئش گونلويه گئري قاييتسين. عريضهسينين اوستونه يازديلار كي ، اولماز. درسلري قورتاراق سونرا.
علاجي كسيلدي. بازارا گئتدي . خئيلي گزدي، دولاشدي، آلوئرچيلرله چنه-بوغاز ائلهدي. و آناسينا آلما آلدي. جور به جور اورهيه ياتان آلمالاردان سئچدي كي، آروادين آغزي دادا گلسين ، اورهيي ايستهدييي قدر يئسين . او ايستهييردي كي، آلمالاري اؤزو آپارسين، اؤز الي ايله آناسينا وئرسين، آمما پوستلا گؤندرملي اولدو. آلمالاري تاختا قوتويا دولدوروب قاپاغيني ميخلاديلار، كنديرله ساريييب سورغوجلاديلار و يولا سالديلار.
بير گون درس دئدييي زامان صينيف اوتاغينين قاپيسيني دؤيدولر. اونا بير تئلئقرام وئرديلر. كنده چاغيريرديلار. همين آخشام يولا دوشمك ايستهدي. يول پولو يوخدو.
ماعاشا دا هله بئش گون واردي . ائرتهسي گونو بورج تاپيب قاطارا بيليت آلدي. بوتون گئجهني گؤزونو قيرپمادان واقوندا ، پنجرهنين اؤنونده دايانيب سحري آچدي. هئي اؤزونو دانلاييردي كي ، آروادي خسته قويوب شهره ناحاق قاييتدي.
هاوا يئنه چيسكين ايدي. يوللارين كنارينداكي سارالميش اوتلارين، يووشان كوللارينين اوستونه نارين ياغيش داملالاري قونموشدو. او پاي-پيادا ، بير باش ائولرينه گلدي. هله اوزاقدان قاپيدا قيفيل گوروب باشا دوشدو كي ، آناسي ساغ دئييل. دئيهسن اونو گؤزلمهدن آروادي باسديريبلار دا. آللاه كند آداملارينا اينصاف وئرسين، هئچ كسي گؤزلهمهدن هئچ نهايله حئسابلاشمادان رحمته گئدني ائله همين گون ، در حال دفن ائديرلر.
ائوه بورولمادان بير باش كندين آشاغيسينداكي قبريستانليغا دوغرو گئتدي. يئنيجه تاپدالانميش يووشان كوللارينين اوستوندهكي آياق توتوب ايرهليلهدي و چيسكينلي هاوادا ، دومان ايچينده اوجقاردا قبير و اونون يانيندا بوزوشوب اوتوران آتاسيني گؤردو. كيشي ائله بيل كئيلشميشدي. اوغلو ياخينلاشاندا دا يئريندن قيميلدانمادي، اونونلا ياناشي اوتوراندا دا ترپنمهدي. گؤزونو هله تورپاغا ياپيخماميش[11] قبيره زيللهنيب داياندي.
كيشي ائوه دؤنمك ايستهميردي. اونو ائوه چكن بير دويغو قالماميشدي. توخونان اولماسا ، بلكه ائله بورداجا گئجهلر ، سحرهجهن قبيرين كئشيييني چكردي. قارانليق قاريشاناجان اوتوردولار. آتا-اوغول گاه تورپاغي سيغاللاديلار، گاه قبيرين اطرافيني تميزلهديلر. گؤز-گؤزو گؤرمهيهنده قبريستانليغين واهيمهسي گوجلندي. اوغول آتاسينين قوللاريندان توتوب قالديرماق ايستهدي، كيشي ترپنمهدي. اونون تيترك سسي ائشيديلدي:
- گؤرهسن دوزدور مو؟
- هه؟
- ايلانين اؤلونون گؤزونو يئمهسي . دئييرلر اؤلونو باسديران كيمي ايلان گليب مئييتين گؤزونو يئيير.
اوغلان آتاسينين سؤزوندن دهشته گلدي. باشينين توكلري بيز-بيز اولدو. جانيندان ائله بيل گيزيلتي كئچدي كي ، اورهيين بوزلاميش كيمي گؤينهدي. قهردن آغزيني آچيب بير سؤز دئيه بيلمهدي.
كيشي ديزلرينه ديرسكلنيب آياغا قالخدي. آلاقارانليقدا قبيرين اطرافينا فيرلاندي، هر يئره ديقتله باخدي:
_ سحردن گؤزلهييرم . بورايا هئچ بير قوش دا سكمهييب[12]. گلسه گؤرهرديم.
اوغول اونو ساكيتجه قبيردن اوزاقلاشديردي. قورخدو كي ، بيرآزجادا بورادا قالسالار، درددن كيشينين باشينا هاوا گلر. خئيلي آرالانديلار. كيشي غفيلدن آياق ساخلادي، قانريليب قبريستانليغا باخدي.
- سن گئت ائوه ، من قاييديم. اونوتك قويا بيلمرم. ايلانلار بيلسهلر كي ، هئچ كس يوخدو ،گليب گؤزلريني يئيهرلر.
او گئجه بير يورغان-دؤشكده ياتديرلار. اوشاق واختي اولدوغو كيمي آتاسينين كورهيينه قيسيلدي، نفسي ايله اونو ايسيتدي.
بئلهجه يئدديسينه قدر گؤزلهديلر.قونشولارين كؤمهيي ايله بالاجا،كاسيب بير سوفره دوزلتديلر. بئش – اون آدام ييغيلدي. ائله بو واخت كند پوچتالييونو قولتوغوندا تاختا قوطو دوققازدا گؤروندو. او ، آلماني گتيرميشدي. شهردن آناسينا گؤندردييي آلما ايندي گليب چيخيردي.
بو دفه باكييا تك قاييتمادي. آتاسيندا اؤزو ايله آپاردي.شهرده كيرايه داريسقال ائوده بير يئرده ياشاديلار. آتاسينين قوللوغوندا دوردو. كيشيني حاماما آپاردي، اوست –باشيني بير تهههر ساهمانا سالدي، آخشاملار اؤزو ايله گزمهيه چيخارتدي، چاليشدي كي آتاسينين فيكيريني داغيتسين. آنجاق حيسس ائديردي كي ، كيشي اووونمور، اوزه ورماسادا اورهيينده خيففت ائلهيير، اللي ايلدن چوخ مئهريني سالديغي ، بير ياسديغا باش قويدوغو ، آغلي – قارالي گونلرده هياني اولدوغو آروادينين خيففتيني ، ائل- اوباسينا ، كند- كسهيينين خيففتيني. اونا دئميشديلر كي ، آتان تقاعوده چيخاندان سونرا دا هر گون تئزدن مكتبه گئدير، موعلليملر اوتاغيندا اوتورور، تنففوسلرده اوشاقلارلا اوينايير، اونلارلا بيرليكده ده آخشام اوستو ائوه قاييدير. بلكهده بونو ياشادان ائله بونلار ايدي؟! ايندي شهرده قفسه سالينميش قوش كيمي چيرپينير، اوغلو ايشده اولاندا، پنجرهدن بويلانير، خياليندا هئي اوزاقلارا گئدير، داغي آرانا ،آراني داغي كؤچوروردو.
قيشي بير تهههر باشا ووردولار. يازين بورنو دلينن كيمي ناراحاتليق باشلادي. كيشي ايپه – ساپا ياتمادي، - مني يولا سال، گئديم،- دئدي،- داريخيرام. سنين ده يئرين داريسقاليدي. – نه قدر توتدوسا دا اولمادي و شهره گلميش باجيسي اوغلونا قوشولوب كنده قاييتدي...
بير – ايكي يئنه تئلقيرام گلدي، قارا خبرله دولو بير تئلقيرام. ائله همين گونو تلهسيك يولا دوشدو. «آناما اليم چاتمادي، هئچ اولماسا كيشيني اؤزوم دفن ائديم، اونو سون منزيله اؤزوم يولا ساليم»- دئدي . بوتون يول بويو دوشوندو. آنجاق يئنه گئجيكميشدي. اونو گؤزلهمهدن آتاسيني دا باسديرميشديلار. آغلادي. آخشاماجان غريبه كيمي بير-بيرينين بؤيرونه قيسيلان قوشا قبيرلرين يانيندا اوتوردو.
او ، موحاريبهده اولاركي تئز-تئز دوشونوردو كي ، آللاه ائلهمهميش آتام ، يا دا آنام اؤلرسه و اونلاري منسيز باسديرسالار اورهييم پاتلار. آمما ايندي ياريم سوتقاليق[13] يولدا اولا- اولا اونلارا الي چاتماميشدي، سون نفسلرينده باشلارينين اوستونده اولماميشدي. بودا اؤولاد، بو دا اوغول- اوشاق! آياقلاري يئر توتان كيمي باش آليب گئديرلر، بيرده بويا- باشا چاتديقلاري يوردا قاييتماق ايستهميرديلر.
آخشام اوستونه ياخين اؤزونه تسللي وئردي: بلكه ائله بئله ياخشيدير، اونلاري اؤلوم ياتاغيندا كفنه بورونموش حالدا گؤرمهديييم مصلحتايميش. منيم خياليمدا بوتون عؤمروم بويو اونلار ديري قالاجاقلار. دوغرودان دا، نه قدر چاليشسادا، آتا –آناسينين اؤلومونو تصصووروندا جانلانديرا بيلمهدي. كيشي آخيرينجي دفه باكيدان يولا دوشنده اوغلونا نئجه باخميشديسا او شكيلدهجه گؤزونون قاباغيندا داياندي. سونرا خيال اونو لاپ اوزاقلارا، اوشاقليق ايللرينه آپاردي. اونا ائله گليردي كي ، آتاسي ساغدير، اونون اليندن ياپيشيب گئجه كورسونا درس دئمهيه گئدير. اللرينده فانار اولاردي، هم قارانليقدا يولو ايشيقلانديرارديلار. هم ده كندين جاناوار باسان ايتلري اوستلرينه تؤكولدوكده ايشيقلا اؤزلريني قوريارديلار. ايتلر نهدنسه ايشيقدان قورخوردولار. دئييرديلر جاناوار دا بئلهدير، اودا- آلاوا ياخين گله بيلمير. آتاسي همهشه اونو اؤزو آپاراردي هم هيان اولار، هم ده ائله بالاجاليغيندان اونا دا موعلليمليك اؤيرهدردي. زئرزميسي كولخوزون آنباري اولان كند وارليلارين هانسينينسا موصاديره ائديلميش ائوينين اوست گؤزونده آروادلارا درس دئييرديلر. اونلارين اوشاق كيمي اللريندن توتوب حرفلري ، اؤز آدلاريني يازماغي اؤيرهديرديلر. آروادلار يئنيجه ديل آچيرميش كيمي حوججهلهيه – حوججهلهيه كيتاب اوخوياندا آتاسي سئوينديييندن گئري قالمازدي. كندده جميسي اوچ – دؤرد موعلليم واردي، آمما يوز آدام ايشيني گؤروردولرگوندوزلر درس دئيير آخشاملار كورس آچير، ايستيراحت گونلري قونشو كندلرين موعلليملريني ده ييغيب«تئاتر» حاضيرلاييرديلار. اوگوروردو كي ، آتاسي بو ايشلره باشچيليق ائدير، هامييا گؤستريش وئرير، كيمين گئجه ، نه واخت دانيشاجاغيني اؤيرهديردي. يامان گؤزل گونلر ايدي. ائيوانلارا ديرماشيق موعلليملرينين چيخارديقلاري اويونلارا تاماشا ائديرديلر. بيرده كنده سس ياييلاردي كي ، بو آخشام «تئاتر گؤستهرهجكلر». و او واخت كلوب يوخويدو. تاماشاني سامانليقدا گؤسترهرديلر. اوشاقلار چالغي قيزلار سوپورگه گؤتورودولر. هر يئري تر–تميز سيليب سوپوروردولر. كيليمدن پرده دوزهلدير، يئره پالاز دؤشهييرديلر. قويون يونوندن ، كئچي توكوندن بيغ ساققال دوزهلدير، اؤزلريني ائله كؤكه ساليرديلار كي ، هئچ آتا اوغونو تانييا بيلمزدي. تاماشادان خيالي اوول كند زورناچيلاري زيله چكيب ، گلين كؤچورورلرميش كيمي «آتدانديرما» چالار، كنده هاي-هاراي ساپارديلار.قارانليق قاريشماميش كند آخيب گلر، ايچريده قيز- گلين اليندن ترپنمك اولمازدي. آتاسي اونو دا بو ايشلره قوشاردي. كيشينين شعير يازماغي دا واردي. موللالارين بالاجا قيزلاريني مكتبدن چكيب اره وئرن والدينلرين علئيهينه شعير يازاردي و وئرردي اوغلونا . اودا آخشاملار يولداشلاريني باشينا ييغيب چيخاردي دامين بئلينه و همين شعيرلري شرقي كيمي اوخويارديلار. او واخت بو ايشلرين نه قدر قورخولو اولدغونو باشا دوشمزدي . بيلمزدي كي، آتاسيني يانييرلار[14]،« كوچويون سسيني كس، يوخسا باشيني كسريك»،-دئييرديلر. حتتا بير دفه گئجه ياريسي پنجرهلرينين شوشهسي چيلينگ-چيلينگ اولدو. ايشيقلاشاندا گؤردولر كي ، پنجره تاختالاري گوللـهدن دئشيك دئشيك اولدو. آناسي تلاش ايچينده اونو باغرينا باسدي، بوندان سونرا اونو گؤزوندن قويمادي، تك باشينا ائودن باييرا بوراخمادي...
بئله گونده اونو تك قويمايان بيبيسي اوغلو قولونا توخونماسايدي كيم بيلير داها نهلري يادينا سالاجاقدي. هاوايا باخدي. قارانليق قاريشيردي. باشا دوشدو كي ، گئتمك واختي دير. آياغا دوردو اوستونو چيرپيب قبيرلرين اطرافيني دولاشدي و بيردن ديليجان درهسيندهكي الچاتماز، گؤز ايشلهمز و اينسان آياغي دهيمز سيلديريمقايانين اورتاسينداكي «جنازهني» خاطيرلادي. اونو دفهلرله گؤرموشدو. اوشاق واختلاري آرابالاردا گؤيجه ماحالينا يايلاغا قالخاندا قوجالار دفهلر همين يئري بارماقلا گوستريب سؤيلهميشديلر كي ، كئچميشده آدلي – سانلي بير كيشي اؤلوب . اؤلنده وصيت ائلييب كي ، اونو ائله يئرده باسديرسينلار كي ، ايلان تاپيب گؤزلريني يئمهسين. اوغلانلاري اونو داغ چايينين ساحيليندهكي سيلديريم قاياليغا گتيريبلر. كندير ساللاييب جنازهني ال چاتماز يئرده باسديريبلار. گئري قاييداندا دؤنوب باخيبلار و دهشت ايچينده گؤروبلر كي ، بير ايلان قايالارين آراسي ايله سورونه –سورونه قبره ياخينلاشير، هاي-هاراي ساليرلار، گوللـه آتيرلار، آنجاق ايلان شوتويوب اؤزونو مئيييتين اوستونه سالير...
گؤدهكجهسينين ياخاسيني قالديردي. پاپيروس يانديردي. توستونو جييهلرينه چكيب داياندي. دريندن كؤكسونو اؤتوروب فيكيرلي – فيكيرلي آدديملادي. بئش – آلتي آدديم گئتمهميش داباني اوسته فيرلانيب قاييتدي. اونون گؤزلري آلاجالانميشدي. سينهسي كؤروك[15] كيمي قالخيب ائنيردي. بيبيسي اوغلو اونون اورهييندن كئچنلري آنلادي. ساكيتجه قولونا گيريب قبريستانليقدان آرالادي.
قاييداندا ائوه بورولدولار . ايچري بوم بوزويدو. ديوارلار قوزولاييب تؤكولموشدو. تورپاق تاوانين آغيرليغيندان پرديلر[16]، كرنلر[17] قارينلاميشدي. هاوا ايليق اولسادا ايچري ده اؤلوم سويوقلوغو واردي. ائله بيل بوراداكي خاطيرهلر اؤتن آغلي-قارالي گونلر ، سئوينجلر ، كدرلر بوز كيمي سويوق بير نفسين تاثيري ايله دونموشدو. او باشا دوشدو كي ، بو ائوه سون گليشيدير. اونو بورايا چاغيران ، بورايا باغلايان تئللر ، آرتيق يوخدور، ابدي قيريلميشدير. آناسينين نفسي ، آتاسينين هنيرتيسي بير داها دويولماياجاق، اونو ايسيتمهيهجك...
او ، سونرالار دا بئله دوشونوردو. آنجاق گؤرونور ، دهده-بابا يوردوندان آيريلماق او قدر ده آسان ايش دئييل. بيليردي كي ، كندده ائولري يوخدور، قاپي-باجاني اوت-علف باسميشدير. آمما قبيرلري كي واردي. فورصت تاپاراق ايلده بير-ايكي دفه گلردي، آتا-آناسينين تورپاقلارينا باش چكردي. الينه كئچن پوللاري ساخلاميش قبيرلرين اوستونو گؤتورموشدو. باش داشي قويدورموش ، اطرافينا دمير محججر چكديرميشدي.او زامان قبيرلرين اوستو كاسيب ايدي. تاختادان ، يا دا عاديجه داشدان نيشانه قويوب مرحومون آد-فاميلين يازارديلار كي، ايزي ايتمهسين. ياز-ياي آيلاريندا يووشانلار قالينلاشيب و قديم ، اوجا قيرميزي باش داشلاريندان باشقا هئچ نه گؤرونموردو. ايللر كئچديكجه باشا دوشدو كي، هارا گئتسهده هئچ اولماسا، ايلده بير دفه واخت تاپيب كنده گلمهليدير. اؤزو ده گلنده رنگ ، فيرچا گتيرهردي. هئچ كسي ياخينا قويماز، داشلارين اطرافينداكي اوت – علفي اؤزو تميزلر، داشلاري ماوي بويا ايله رنگلهيهردي، چاليشاردي كي ، يازيلار، رقملر ايتمهسين، آيدين گؤرونسون. سونرا اؤزو ياشا دولدو، آغيرلاشدي. باشي ايشه- گوجه قاريشدي، قايغيلار چوخالدي و قبيرلرين اوستونه گلن جيغيري، ائله قبيرلرين اؤزونو اوت باسدي، رنگلر بوزاردي، محججرلر پاس آتدي، سينه داشلاري يانا اهييليب چؤكدو. بيرجه باش داشلاري روزيگارا بويون اهيمهدي...
بير گون يئنه يوخودا قوجالاري گؤردو. گؤردو كي يئنه كنده گليب، بيلمير نئيلهسين: اونلارين يانيندامي قالسين، يوخسا شهره قاييتسين. بئله يوخولار تئز-تئز تكرار اولدو. بعضن گونآشيري[18] ، بعضن ده هفته آشيري يوخودا كنده قاييديردي. اورهيينين ياريسي كندده ، ياريسي شهرده ايدي آياغينين بيري بورادا ، او بيري قوجالارين يانيندا ايدي. گوندوزلر قاش- قاباغي آچيلميردي. درديني هئچ كسه دئمهسهده ائودهكيلر باشا دوشوردولر كي ، گون- گوندن سينيخير، ايچريدن ياراسي قؤور ائلهيين[19] آداملار كيمي بوزوشوب سوزالانيردي. ساچ-ساققالي آغارميشدي. تئز-تئز اورهيينده قالخان سانجي كورهيينه ووروردو. جيبي داوا-درمانلا دولويدو. تاي- توشلاري دا سئيرهليردي. همياشلاريني بير-بير قارا تورپاغا تاپشيريليرديلار. ناظيم حيكمت دئميشكن،«نسيللرينين يارپاق تؤكومو» باشلاييردي.
اووللر شهر قبريستانليغينا يولو آز دوشردي، بلكه ده اورانين سمتيني هئچ تانيمازدي. آمما آخير واختلار تئز-تئز گئتمهلي اولوردو. دوستلاريني ، تانيشلاريني چييينلرينده آپاريرديلار. هر دفه ده گؤروردو كي ، تورپاق، آزالير ، قبيرلر سيخلاشير. بير طرفدن ده شهر يئرينيب قبريستانليغي باشقا يئره كؤچورهجكديلر، ماشينلاري ساليب هر يئري دوزلهيهجكديلر، اينسانلارين سون نيشانهلرينين هئچ ايزي-توزو دا قالماياجاقدي. باكي كندلريندن اولانلار ياخشي ائلهييرلر: اؤز اؤلولريني اجدادلارينين ياشاديغي يئرلرده قوهوم-اقريبالارينين يانيندا باسديريريلار. ياس يئرلرينده دوست تانيشلاريندان تئز-تئز بئله سؤزلر ائشيديردي: «كند ياخشيدير، اؤلنده وصييت ائلهجهيم مني كنده آپارسينلار، آتا-آنامين يانينا». بو سؤزلر اونون دا آغلينا باتيردي، آخير واختلار ايسه قطعي قرارا گلميش و اورهيينده هر شئيي اؤلچوب- بيچميشدي. هاوالار دوزهلن كيمي مأذونييتيني گؤتوروب كنده گئدهجهييني يقينلشديرميشدي. گئدن كيمي اوستا تاپاجاق، قبيرلري سؤكدوروب ، اوستونو تزدهدن گؤتوردهجك و ائله ائدهجك كي ، اونلارين يانيندا اؤزونهده يئر قالسين. حتتا جاماعاتا اذيت وئرمهمك اوچون اوولجهدن هر شئي حاضيرلاماغا دا پلانلاشديرميشدي. ائله بو مقصدله ده آپرئلين اوولرينده كنده گلميشدي.
يازين ايليق نفسي دويولوردو. آغاجلارتومورجوقلاميش، بوداقلار شيرهلهنيب گؤيهرميشدي. اوتلار هويخوروب قالخميشدي. آرتيق چپرلرين ديبينده بؤجوكلر گؤرونوردو. او ، عادت اوزره بيبيسي اوغلونو و اونون اوشاقلاريني دا گؤتورهرك پيياداجا كندين آشاغيسينداكي قبريستانليغا گئتدي. يولونو ائولرينين يانيندان سالدي. چيي كرپيچدن تيكيلميش اوتاقلاري اوچموشدو . قاپي-باجاني كئچن ايلدن قاليب قورويان قانقال[20] ، اوت – علف باسميشدي. جيغيرلار چوخدان ايتيب –باتميشدي. يانينداكيلارا سئزديرمهدن ديلينين آلتينا درمان قويدو، سسسيز- سميرسيز كؤهنه يوردون يانيندان اؤتوب كئچديلر. كندين آشاغيسينداكي تپهجيكلر ده گؤيهرميشدي. ياشيلليغين اوستونه بالاجا گؤي چيچكلر سپهلنميشدي. لاپ اوزاقدان ايري باشداشلاري گؤرونوردو. او، همهشه بورايا گلنده بير مئتيردن چوخ تورپاغا ايشلهيهن ايكي مئتير ياريما قدر هاوادا قالان بو توند قيرميزي قيرانيتدن يؤنولموش قديم باشداشلارينا ياخينلاشاردي. اونون ناخيشلارينا يازيلارا باخاردي. يازلار آيدين ايدي. اوستونو نازيك مامير[21] اؤرتسهده هر شئييي اوخوماق مومكون ايدي. آمما يانا- يانا قاليردي. بو اليفباني بيلميردي. كئچميشين ساوادليلاري دا قيريليب توكنميشدي.
قبريستانليق خئيلي بؤيوموشدو، اؤزوده سلقه-سهمانا دوشموشدو. اطرافا محججرلر چكيلميش آغاجلار باسديرلميشدي. حال بوكي ، بورادا اووللر ايكيجه ساهمانلي قبير واردي. بيري اونون كئچميش مكتب يولداشينين آتاسينين قبيريايدي، اؤز الي ايله دوزهلتميشدي. بيري ده كي ،آتا – آناسينين .
تپهني ائنيب چؤكهيه[22] ، كؤهنه قبيرلره دوغرو گئتديرلر. توپوغو قدر چيخان قورو اوتلارين ديبي جوجهريب ياشيللاشميشدي. قبيرلرين چوخو چؤكوب بو اوتلارين آلتيندا قالميشدي. اونلار باخيمسيزليقدان اوت-علف ايچينده ايتن قوشا قبيره ياخينلاشديلار. اهييلميش باش داشينداكي يازيلار پوزولموشدو. او، آتاسينين آد ، فاميليني ، ايللري گوجله اوخودو. محججرين اطرافيني دولاشديرلار. فيكيرلري قاپيني آچماق ، اوت – علفي تميزلمك و دميرلري رنگلمك ايدي. اوشاقلار پاسلي قيفيلي آچماق اوچون خئيلي الـلهشديلر، وينتي[23] بورا بيلمهديلر. بيردن اونون گؤزونه قبير بويو ، اوتلارين آراسيندا حلقه-حلقه قيوريلان ساري بير شئي دهيدي ديققتله باخيب گؤردو كي ، بو بير نهنگ ايلاندير، اؤزوده قيزيل ايلان! اونون لاپ يانينداكي اوتلاري اينديجه تاپدالاميشديلار، اوشاقلار حتتا قورخودان قاچيب اوزاقلاشديلار. بير آز توختاديقدان سونرا بو دهشتلي ايلانا كناردان باخديلار. اوولجه آييرد ائده بيلمهديلر كي ، قيوريليب ياتان ايلان بيردير، يوخسا ايكي . گؤرونور ايلانين دونو يئنيجه آچيليردي. دئيهسن گوجله سورونوب اؤزونو گونه وئرميشدي.
بدنيندن اوولجه گيزيلتي كئچدي، سونرا اونو سويوق تر باسدي، بيرجه آندا سويا باتدي. حيسس ائلهدي كي بالديرلاري ديزلريندن بوكولدو، اورهيين سانجدي. ييخيلماماق اوچون ياخينداكي باش داشينا سؤيكندي. گؤزلري آلاجالاندي. ايلان ايسه داشين بؤيرونده قبير بويو اوزاناراق اؤزونو آرخايينجا گونه وئريردي.
اوشاقلاردان بيري داش آتدي. ايلان قيوريليب ترپندي، آغير – آغير ، آستا-آستا. آغاج گؤتوروب اونو اؤلدورمك ايستهديلر. بونو حيسس ائدن ايلانين قيوريمي آچيلدي و او ايكي قبيرين آراسينا دوغرو سوروندو. ائنديريلن آغاجلار، آتيلان داشلار اونو توتمادي. ايلان فيرلاندي و داشلارين آراسينداكي دليكدن سوروشوب قبيره گيردي. اوغلانلاردان بيري جيسارتلنيب ياريدان چوخو قبيرده اولان ايلانين قويروغوندان ياپيشماق ايستهدي. قويمادي و بيردن اونون آغلينا دهشتلي بير فيكير گلدي. بلكه بو قيزيل ايلان آتاسينين ،يادا آناسينين روحو ايدي. آخي دئييرلر اينسان اؤلنده اونون روحو حئيوانلارين صيفتينده يئنيدن پئيدا اولار و بوناگؤره ده هيندليلر حئيوانلارا توخونمورلار. دهشت ايدي. بو فيكير اونون آغلينا هارادان گلدي؟ نييه محض ايلان شكيلينده ،اؤزوده قيزيل ايلان جيلدينده اونو قارشيلاميشديلار؟ يوخسا اوندان اينجيميشديلر؟ اونلاري تك قويدوغونا ، دهده-بابا يوردونو آتيب شهره گئتدييينه گؤره اوندان اوز دؤندرميشديلر؟ آخي سون نفسلرينده گرك اونلارين يانيندا اولايدي، اونلارين گؤزنو سيغايايدي. بلكه اونا دئييلهسي سؤزلري واردي، وصيييت ائدهجكديلر؟ آناسي اونو بير ايشه بويوراندا همهشه «آ چيينيينده گئديم»، - دئيهردي. «بس نه اولدو، جنازهني گؤتورنده هارا ايتيب باتدين؟ اووللر هئچ اولماسا آيدا-ايلده بير دفه اوستوموزه گلردين. بيزه او ساعات عيان اولاردي كي ، اوغلوموز بيزي ياددان چيخارتماييب. آمما سونرا سينهميزين اوستونه بير داش ، باشيميزا دا بير داش قويوب يوخا چيخدين. بس ايندي گون هاردان دوغوب، بيزي نه ياخشي يادا سالميسان؟! يوخسا، اؤزونه يئر آختاريرسان، يانيميزا گلمك ايستهييرسن؟ گئج دئييل مي، اوغول؟ گلمه، مصلحت بيلميريك. گلسن روحوموز سني تاس-تاس ائلييهجك، قيزيل ايلانا دؤنوب اوستونه آتيلاجاق و آداملارين آياغين قبريستانليقدان چكيلمهميش سورونوب گؤزلريني يئيهجك».
ائله بيل اونون ايچينده بير شئي چيلينگ–چيلينگ اولوب اووخالاندي. بيرجه آنين ايچينده يوماغا دؤندو، ديلي دوداغي تپيدي، جانيني تيترتمه آلدي، حيسس ائتدي كي ، داها گئري قاييدا بيلمز. سون منزيلده آتا – آناسي ايله ياناشي ياتا بيلمز. اوولكي اينجيكليك بير يانا، بوگون ده اونلاري كوسدوردو، گونون آلتيندا سوموكلري قيزسين. داش آتيب اينجيتديلر قيزيل ايلاني . آمما قيزيل ايلان دا اونو هوركوتدو. اوزوده ائله هوركوتدو كي ، چتين كي ، بير داها اورك ائلهييب گئري قاييدا بيلسين. چتين ، چوخ چتين!!!
[1] Nargin
[2] Mayaq:دنيز چيراغي،دنيز فانيسي
[3] Yumaq:ساپ كلفي
[4] Peç:بوخاري
[5] Sürüşkən:زوو(فارسجا=ليز)
[6] Səyrimək:تيترهمك
[7] Yanpörtü:بيريانلي،اهيري
[8] Çimir etmək:داياز يوخويا گئتمك
[9] Rayon:ناحييه
[10] Stansia:ايستگاه
[11] Yapıxmaq:ياتماق، باسديريليب-سيخيلميش كيمي اولماق
[12] Səkmək:سيچراماق، هوپپانماق
[13] Sutqa:24ساعات
[14] Yanımaq:تهديد ائتمك
[15] Körük:دميرچي كورهسيني پوفلهيهن آلت
[16] Pərdi:سقفده ايشلهنيلن آغاج
[17] Kərən:سقفين آغاج ديركلري
[18] Günaşırı:بيرگونآرا
[19] Qövr etmək:اينجيتمك
[20] Qanqal:كنگر
[21] Mamır:خزه
[22] Çökə:بير جوره آغاج
[23] Vint:پئچ
