گون اورتا ايدي. نيسان گونشي هر يئره يايلميشدي و يئل آغاجلارين سارالميش يارپاقلاريلا قووالا-قاچدي اويناييردي. خديجه پنجرهنين داليندان چكيليب:
-سارالميش يارپاقلاردا هله ده ذؤوق وار، باخ گؤر نئجه يئل ايله اويناقلاييرلار، - دئدي، - من ده نييه ذؤوق يوخدور، نييه اورهييم هئچ آچيلمير، من كي هله ساراليب- سولماميشام ، ياشاييشيمين خزانينا گيرمهميشم، نييه ووجودومدا حيات دان خبر يوخدور؟ نه دن بؤيله اولدوم، اؤلولرله منيم نه فرقيم ؟ فرقيم سادهجه تورپاقدادير.
خديجه بيشيردييي يئمهيين آلتين آزالديب، - ايفطارا چوخ قالير، -دئييه - پالتارلاري ماشين ايچيندن چيخارتدي. پيللهلري ائنيب، پالتارلاري حيط ده ايپ اوستونه سرمهيه مشغول اولدو.
فيكرينده بوگون ائلهدييي ايشلري، تسبيح دنهسي كيمي ايپه دوزوب، چئوريرمهيه باشلادي.
هانسي ايشلري قاليبدير. هانسيلاري گرك قاباغا ساليب، يئربهيئر ائلهيهجهيينه قرار وئردي كي، بير سس فيكريني داغيتدي.
بيري قاپييا آچار ساليب، آچماغا چاليشيردي. آمما باشارا بيلميردي.
-گؤرهسن كيمدير؟- دئدي و يئل داغيلدان توكلرينه ال چكيب، بوغوناق بير سسله:
-كيمسن؟، -دئدي.
سس چيخمايينجا ، جانينا قورخو دولدو. «اوغرو اولمايا؟» ايختيار سيز بير حالدا الي، دووارا دايانميش يون چيرپان آغاجينا طرف اوزاندي.
«گؤرهسن كيمدير؟ بو ساعات دا نه جورعتله بيرينين ائوينه گيرمهيه چاليشير. حتم بيلمير، بو ائوي آلماغا گؤره وار- يوخوموزو ساتديق، گئتدي. الينده بيچاق يا دا آيري بير سيلاح اولماسين.»
خديجهنين ديزلري تيترهييردي. بئينينين ايچينده هر شئي بير بيرينه قاريشميشدي.
«نهدن قورخورام كي، اؤلومدن آرتيق وار مي؟ بو فيكيرله بير درين نفس آليب قاپييا ياناشيب، دوردو. هر كيمدير. آچاري يئرينه سالا بيلمير. شايد ده فيليملرده كي، كيمين بير باش سانجاغيلا، يا دا بير مفتول تيكهسيله آچمايا چاليشير. آمما، ... اللري تيترهيير. دوغرودور هر كسدير ايظطيرابي واردير. آمما نه دن؟ كيم دن قورخور، من دن مي؟ گولومسوندو. قورخما، راحات اول، منيمله بير- ايكي دقيقهيه باشا گلرسن. قوي سنين ايشييين راحاتلاييم.» نفسيني ايچينده حبس ائديب؛ بيردن قاپينين رزهسيني چكدي. قاپي آچيلدي، قاپينين داليندا صمد دورموشدو، الينده قاپينين آچاري واري ايدي، ديققتله باخدي. صمدين اللري تيترهييردي.. گؤزلري دولوب، ديزلري بوكولموشدو سانكي. خديجه تعججوبله:
-صمد سنسن مي؟ اودومو چاتلاتدين. يوخسا باش گتيرميسن ؟
صمد سرخوش آداملار كيمين ايدي. ايچري گيرمهيه هئچ نئيتتي يوخ ايدي. آغاج خديجهنين اليندن دوشدو. صمدين اليندن توتوب ايچري چكيب، قاپيني باغلاييب. صمده ياناشدي.
-نه اولدوغونو سؤيلهيهجكسن مي؟ ، - دئدي، - بو ساعاتدا ائوده نه ايشين وار، سنينلهيم صمد، جانيم چيخدي، دانيش.
صمد سوسموشدو.
- يوخسا ايشدن مي آتيلدين؟
صمد باشيني قالديريب خديجهنين اوزونه باخدي. گؤزلرينده دولان ياش دامجيلاري دوشمهيه جورعت ائتمهيينجه، گوزلرينين كاساسي ايچينده شپهلنمهيه باشلاميشديلار. خديجهنين فيكري قاريشميشدي. هئچ نهيه فيكير وئرهبيلميردي. صمد هئچ بير زامان آغلاماميشدي. سانكي بير داش ايدي. « نه اولوب بو داش اريمهيه باشلاييب، -- دئييه سوروشدو.» آغزينين سويو قوروموشدو خديجهنين. قلبينين تاپ- تاپ سسيني ائشيديردي. جهد ائلهدي. صمدين فيكريني اوخويا. موففق اولماينجا عاجيزانه صمدين اوزونه تيكيليب قالدي.
صمد باشيني ياواش- ياواش قالديريب تيترهين بير سسله:
-سوسن اؤلدو ، -دئدي، - و گؤز ياشلاري جلد دوشمهيه باشلادي. خديجهنين قيچلاري بوكولدو و يئره سرهلهندي.
خبري آغزينين ايچينده چئينهمهيه باشلادي. آجي بيبر كيمين ايدي. يانديردي- ياخدي خديجهني. سونرا بير يئرده ساكين قاليب قوخوموش سو دادينا دونوشدو. اورك- جييهري بير- بيرينه قاريشدي. خديجه غئيظله آغزينا ييغيشان سويو ايرهنهرك يئره توپوردو.
- ظارافاتين توتوب؟ ، - دئييه ، - سوروشدو.
صمدين سارلميش رنگي و سولموش صوفتي هر شئيي ديلسيزجه سؤيلهييردي. آمما نهدنسه خديجه اينانماق ايستهميردي. حيرصيله يئنه سوردو:
-صمد، دوغرو دئميرسن ، دئييل مي؟
صمد سادهجه آغلاييردي و گئتديكجه هؤنكورتوسو هر يئره چؤكوردو.
نئيسان هاواسينين سازاغي خديجهنين ووجودوندا نوفوذ ائلهديكجه، اوشومهيه باشلاييب، يئردن آلتينا سويوق چيخينجاق اؤزونه گليب، صمده باخدي.
صمد، اوشاقلار كيمي اوتورموشدو. بير خطاكار و يا گوناهكار اوشاق كيمي. اونلاردان كي، ايشي گؤروب ، سونرا پئشمان اولوب، مظلوم بير قيافه توتوب، دووار ديبينده اوتوروب، ديلسيزجه باغيشلا دئييرلر. صمدين بوينو چيينينين اوستونه دوشموشدو. باشي آغاريب. توكلري توكولموشدو. « نهدن اينديه كيمي موتهوججيه اولماميشديم؟ صمديله ائولنمهييميزدن نئچه ايل كئچيبدير؟ اون ايل. اون ايل بوندان قاباق اولسايدي. آغلامازيدي. اؤزوندن چوخ راضي اولدوغوندان، هئچ كيمي بهيهنمزيدي. هركسه بير ايراد قوشوب، رحمتليك آغاسي كيمي هاميني جاهيل و ائششك بيلهردي. گؤرهسن مني ده ائششك ظنن ائديرميش؟ شايد ده، او زامانلار كي منه آنلاميرسان، قانميرسان، دئييرميش. اوستو اؤرتولو ائششك ظن ائديرميش مني.»
صمد ايندي آغلاييردي. خديجه اونا باخديقجا حيرص چكيردي. هاراي چكيب، باغيرماق ايستهييردي. اونا، نييه آغلاييرسان، سن كي دونهنه كيمين هر سؤزون باشي، سوسن سني اؤيرهدير، سنه درس وئرير، دئييردين، سوسنه آراليق قحبهسي دئيين سن دئييلدين بهيم؟ بوغازيندان سس چيخمايينجا، گؤزلري دولوب، اودغونمايا باشلادي- نه دئدي، صمد؟
- سوسن اؤلدو، - دئدي.
خديجه گؤز ياشلاريني سيليب. «يوخ آغلاميياجاغام. بو بير ظارافاتدير. دونن سوسنله بازارا گئتميشديك. صاباح دا اونو دوكتورا آپاراجاغيديم».
سانكي بير رياضييات موعاديلهسي ايدي، بو خبر. خديجه اونو حل ائتمك اوچون، بئينينده ووروشدورماغا باشلادي. رياضيياتينين ضعييف اولدوغوندان، بيريئره يئتمهينجه، صمده چيغيراراق:
-نه دن سؤزو چئينيرسن، باشادان دئ گؤروم نه اولوبدور، -دئدي.
صمد جلد گؤز ياشلاريني الينين دالينان سيليب، حيرصله:
-منه چيغيرماغا حاققين يوخدور، -دئدي، -يئنه ياديندان چيخارتدين مي؟
خديجه اليني هاوادا توولادي و... غئيظله استغفوروالـلاه، - دئدي.
صمد چيغيرا- چيغيرا :
-« سوسن اؤلدوبدور» دئديم. دونن گئجه احيا توتماقدان گلنده، اونو ماشين ووروبدور. ايندي ده بيمارستاندا ياتيرديبلار اونو.
خديجه:
-ياخشي، -دئدي، - نييه دئييرسن اؤلوبدور. اؤلونو كي، بيمارستاندا ياتيرتمازلار.
صمد حيرصله:
-چونكي، سوسنين بئييني اؤلوبدور، دوكتورلار ساغالماز دئييبلر.
خديجه يئردن قالخدي، اؤز دؤورهسينه بير دؤور دولانيب، صمدين اؤنونده دوروب، بير اليني بئلينه ووردو. او بيريسي اليني هاوادا توولايا- توولايا:
-نييه ساغالمير؟ بهيم...
صمدعصبيلشيب، خديجهنين سؤزونو كسدي:
-چونكي سوسنين ووجودو دا ساليم دئييل، -دئدي، - و سسي ضعيفلشدي. بير يئلي آلنميش ماشين لاستيكي كيمين فيسلدادي و بير يئره ييغيشيب، ميزيلدايا-ميزلدايا: - اوجور كي قارداشي دئييردي، - قارني پارتلاييب، باغيرساقلاري يئرين اوستونه تؤكولموشموش، ووجودونون ايچينده ده قاناما كئچريبدير.
خديجه اللريني قولاقلارينين اوستونه قويدو. داها ائشيتمك ايستهميردي. بيردن اورهيي بولاندي. اليني آغزينا قويوب تووالئته قاچدي و يئديي چورك- پنيري قايتاردي.
صمد يئنه هؤنكورتو ايله، آغلاماغا باشلاميشدي.
***
سوسن زنگائلهييب ، آغلادي.
خديجه ديرناقلارينا لاك ووروردو، مجبورييت دن تئلئفون دستهييني قولاغيلا، چيينينين آراسيندا توتدو :
-قيز بو دا تزه موددور مو؟ ، - دئدي، - قيزلار، گلين چيخان گون آغلاماقلاريني، بزكخانادان باشلاييرلار مي؟ ياخشي- ياخشي بسدير، گؤزلرين قره- قورهسي بير- بيرينه قاريشدي. من هله حاضيير دئييلم، باشيما تزه جندا فري قويموشام، بيليرسن نئينهديم؟ بير آز سويون ايچينه، نئچه دنه قند ساليب. شيرهتوتدوم و تؤكلريمه ووردوم كي، فرلري ياخشي توتا. ايندي سن دئ بزكخانادا نهخبر؟ هارا يئتيردينيز؟
سوسن آغليا-آغليا :
-نه بزكخاناسي ، - دئدي، - من هله ائودهيم. زنگلشديم. يحيا ائوده دئييلدي. قاينانام: گئتمهدين ده گئتمهدين، - دئدي، - قورخورسان ماتيك وورماسان، آرواد اولماياسان؟
خديجه، تومدو. نه دئيهجهييني بيلمهدي. بو دا تزه سؤزدور، قولاق گونده بير سؤز ائشيتمزسه كار اولار... ( بو زاماندا بو سؤز بير آز دا يوخ، چوخ عجيبدير. ) ائله بوردان قاييت... ضررين قاباغيني هر يئردن آلسان منفعتدير... هله ده گئج اولماييبدير... سئويرسن كي، سئويرسن، جانيندان آرتيق دئييل كي... سونرا پئشمان اولسان ، گئري قايتماغين چتين اولار، دئييهجكدي. آمما، - آغلاما ، - دئدي، - حاضير اول، گلديم. سني اؤزوم بزكخانايا آپاراجاغام.
***
سمانه قبير اوستونه آينا- شمدان آليب گتيرميشدي. تورپاقلاري كول كيمي باشينا سووروردو و بير اوشاق بئشييي كيمي ييرقالانيردي. قبير اوستونده اينه سالماغا يئر يوخ ايدي. اؤلو ايدي كي، گتيريرديلر. اؤلولر آمبولانسدان غسسالخانايا- غسسالخانادان، نامازا- نامازدان دا تورپاغا وئريليرديلر. آغلاماق، شيون، سس، هاي-كوي، هر يئري دولدورموشدو. خديجه هر طرفه باخاراق، صمده:
- باخ گؤر اؤلوم نهقدر چوخاليبدير، -دئدي. قديم آيدا- ايل ده بير اؤلو اولاردي او دا قوجا آداملاردان. ايندي اون نفر- اون نفر تورپاغا گئدير اودا جاوانلار. بيزيم دونياميزين باشينا گؤرهسن نه گلدي؟ بير بئله عئلم، تئكنولوژي نهيه لازيمدير؟ اينسانلاري اؤلمهيه تشويق ائلهمهيه مي؟
صمد، خديجهيه قولاخ وئرهرك، آغلاييردي و خديجهنين تعججوب ائلهمهسينه يول آچيردي.
سمانه نهدنسه هئچ دئمييردي. سادهجه تورپاقلاري بير اليله گؤتورورب، سووروب. او طرف بو طرفه ييرقالانيردي. ائلهبيل؛ ساعت شاقولو ايدي.
خديجهنين آناسي، جاماعاتين ايچيندن اؤزونه يول آچيب، بورنونو چكه- چكه خديجهيه ياناشدي:
- قيزيم بير آز آغلا قوي اورهيين بوشالسين. ايچهرييه تؤكمه، سونرا درده دوشرسن، من بونو چكهبيلمرم، بو بيريني قالديرا بيلسم، يئكه آدامام، -دئييب، - ايچري دن سيزيلتيلي بير شيون چكيب آغلادي.
جاماعاتين ايچينده نئچه دقيقه ايدي خديجهنين ديققتيني چكن بير پيچيلداشما باشلاميشدي.
- اوزو كسيلدي بدبختين، هئچ گون گؤرمهدي بوكوپهيين الينده.
- سن ده ائشتدين مي؟
- نهيي؟
- ارينين اويناشي اولدوغونو.
- يوخ جانيم. دوغرو دئييرسن؟
- هه، دوغرودئييرم. اؤزوده رحمتلييين اؤز عميسي قيزيلا.
صمد، مات- مات خديجهنين اوزونه باخيردي. گؤز ياشلاري ياناقلارينين اوستونده دونموشدو. ائلهبيل بو خبر دن ياش دامجيلارينا دا شوك ال وئرميشدي.
خديجه بير آن هارادا اولدوغونو ياد دان چيخارتدي. هئچ اؤز مؤوقئعيييتيني دوشونه بيلميردي. سوسنين اوزونو تجسوم ائتمهيه چاليشدي. ائلهيه بيلمهينجه باشينين ايچي قيزيشيب و هاراي چكدي. سوسنله اوشاقليقدان بير محللهده، بير كوچهده و بير ائولي كيمي بؤيوموشدو. اونلارا محللهده جميع باجيلار دئييهرديلر. جميعلرين بيري نئچه دقيقه بوندان قاباق تورپاغا وئريلميشدي و ايندي ده يحيانين اويناشي اورتايا چيخميشدي و بونلار خديجهنين تصووروندا يئربهيئر اولمايان بير ايتتيفاقلارايديلار. خديجه: «نيييه اينانماييم كي، بو دونيادا هر شئي اولا بيلير. سوسنين اؤلدويو كيمي. سوسنين عميسي قيزي، هانچيسي ايدي. اونو خاطيرلامايا چاليشدي و جلد گؤز آلتي اونو جماعاتين آراسيندا آختاردي. يوخدور. گلمهييبدير. عميسيله، آروادي دا يوخدور. گؤرهسن سمانه بيلير؟، سوسنين آناسي- آتاسي نئجه؟ آدي نه ايدي؟ آهان افسانه ايدي. قارا قاش گؤز ايدي افسانه. توكلري اوزون ، دئييرديلر دانيشگاه دا درس اوخور. آمما نهدن؟ اوخوموش بير قيز ، بير جادده شوفئرينده نه گؤرموشدو. هله آرواد اوشاغي اولان بيريله هئچ ، هله اؤز عميسي قيزينين اريله ...
-سوسن اؤلدو. - صمد دئدي.
نييه اينانماييم كي، اؤلوم حاقدير. هاميا واردير. يحيايا دا واردير. افسانهيه ده. بير گون ده گليب بيزيم ياخاميزي توتاجاق. نه دن بو اوچ- بئش گونو راحاتليقلا ياشامايا قرار وئرميريك؟بو قاچ ها -قاچلار، چالينيب- چيرپينماقلار، نهدندير؟. نه دن صمد ايله من نئچه ايلي بير -بيريميزي تحممول ائتمهيه چاليشريق كي؟ نه دن، سوسن...
بير دن فيكري قاريشدي. :- نييه غسسالخانادا سوسنين اوزونه ديققتله باخماديم، - دئيه، سوروشدو.
سمانهيه ياناشدي. جلد اليني توتدو. سمانه ديسكينيب تورپاقلار اليندن تؤكولدو. خديجهنين اوزونه تيكيليب قالدي. بير آن خديجهنين اورهيي تيترهدي. سوسن شماتتله اوزونه باخيردي. نييه، ايندييهدك ، بو بنزره ديققت ائلهميشديم كي.
خديجه:
-سمانه، نه قدر سوسنه بنزهديييني بيليردين مي؟- دئمك ايستهييردي. آمما، اونا:- بير سوروشدوغوما ديققتله جواب وئر، -دئدي. -سوسنين اوزونو غسسالخانادا گؤردون مو ؟
سمانه باشيلا:
- بلي، - دئدي.
خديجه:
- ياخشي. ايندي دئ گؤروم، سوسنين اوزونده بير اؤپوش يئري يا دا بير ماتيكلي دوداق ايزي وار ايدي؟
سمانهنين گؤزلري دؤرد اولموشدو. بيري اليني خديجهنين چيينينه قويدو. صمد ايدي.
خديجه اليني قوپاريب، دورماق ايستهييردي، آمما هر زمانكي كيمي، گوجو صمده چاتماييب، اونا:
-دور، - دئدي، - ايشيم واردير. اينان عاغليمي اويناتماميشام.
صمد سسسيزجه اليندن توتوب اورادان اوزاقلاشديردي اونو.
***
سوسنين عوضيندن سانكي خديجه اؤلموشدو. رنگي گج كيمي آغاريب، حركاتي ياواشلاميشدي. قاباقلار، تلسه-تلسه هر ايشيني گؤرهردي ، جلد ايدي. اينديسه، گئديردي، گليردي، بيشيريردي، يويوردو، هر ايشيني يئربهيئر ائلهييردي. آمما آيري بير عالم ده سئير ائديردي. بو دونيادا دئييلدي آرتيق.
صمد موبلون اوستونده اوتوروب وينستون سيقارئتيني توستولهييردي. ظاهير ده تئلئويزيونا باخسادا گؤزونون آلتيندان خديجهنين ايشلريني گؤزهتلهييردي. خديجهنين رفتاريندا بير ترسليك وار ايدي. نهدنسه بونو تامام ووجودويلا حيسس ائديردي و بوندان هئچ خوشلانميردي. اونو چوخ سئويردي. اونون بوتون ترس ايشلريني ظاهير ده گؤسترمهسهده، قلبن سئويب، بهيهنيردي.
صمد، خديجهني الدن وئرمكدن چوخ قورخوردو، آمما ، اونا دئيه بيلميردي. آتا-بابادان قالما بير قورو غورورايدي بو. آروادين قاباغيندا اهييلمك قدغن ايدي. آروادا وار- يوخونو بيللنديرمك ده قدغن ايدي. رحمتليك آغاسي دئيهردي: آرواد دئسه گئتمه اورا قويودو ، ييخيلارسان. گئت. قويويا دوش، قوي قول-قيچين سينسين، اؤل. آمما، آروادين سؤزونه باخما. صمد ده باخماميشدي . خديجه اونون اوچون بير سراب ايدي. اوزاقدان ياخشي گؤروشو وار ايدي. اوزاقدان اوندان و اونون محببتيندن دويماق اوچون قاچيب، لهحلييه-لهحلييه اونا يئتيشمك ايستهييردي. آمما، ياخينا يئتيشنده ، خديجه هامان خديجه دئييل ايدي.
ايللر ايدي خديجهيه يئتيرمك اوچون قاچييردي صمد. آمما، خديجهيه يئتيره بيلميردي. خديجهني هر كس بهيهنيردي. اونو سئون چوخ اينسان وارايدي. هر ايش گؤروردو، هر آدديم آتيردي، خديجه ايستر- ايستهمز اوندان قاباق اورادايدي. آدي و يادي، بيشيرديي يئمكلر ، سليقهسيني، گولش- قاباق اولدوغونو و چوخ ايجتيماعي بيري اولدوغوندان ، و البتته اؤز سؤزو اوسته دوردوغوندان، صمدن قاباغي ايدي. بو دا صمده آغير گليردي. بير قادين نهتههر اولار كي، كيشي دن بير آدديم قاباق اولا. بو هئچ ده آتا-بابا دان گلن سؤزلرله تطبيقي يوخ ايدي.
خديجه:
-اونونلا تماسلاشماق ايستهييرم. - دئدي
صمد اؤزونه گلدي، خديجه اؤنونده دورموشدو.
صمد يوخودان آييلان آدام لار كيمي:
-كيم ايله، - دئدي.
- يحيا ايله!
خديجهنين سسي قويونون تركيندن چيخيردي سانكي.
صمد بير آز فيكيرلهشيب:
- سن! بو ايشه قاريشما. -دئدي.
آمما خديجه چوخدان نومرهني توتموشدو و يحيا ايله دانيشيردي:
- سن! هارداسان؟- دئدي، - مگر سوسنين اري دئييلسن؟
يحيا:
- قيچي سينماغين دا بير بئله هاي-كويو واردير، بهيم. آنام ، سوسنين سادهجه بير قيچي سينيبدير، -دئدي.
خديجه:
- نه ائششك آرواديميش بو ننهن. - دئمك ايستهييردي، آمما اؤزونو ساخلادي:
-سوسن اؤلور، بدبختليك بوردادير كي، اؤلومونه ده سنين ايجازهن لازيمدير. ايكي گوندور دوكتورلار سوسني دستگاهلارلا ساخلاييبلار، داها فايداسي اولماديغيندان، دستگاهلاري آچماق ايستهييرلر و بونا دا سنين ايجازهن لازيمدير.
خديجه اللريله موبلون دستهييني اوووجلادي و ديشلريني بير-بيرينه سيخيب. يحيايا باغيردي:
-سن نه جورعتله آديني اينسان قويوب، سونرا كيشي، بير ار، آخيردا دا دهده قويوبسان ، سن نه جور ارسن آروادين اؤلور بيلميرسن، اوشاغين ايكي گوندور آراليقدا قاليبدير، بيلميرسن. لاپ قوياق سوسنين قيچي سينيبدير، سن نييه گرك باشي اوسته اولماياسان، اهح، كيمه دانيشيرام كي، سن نه زمان آرواد- اوشاغين باشي اوسته اولوبسان كي، بو اولا ايكينجيسي.
خديجه تيترهيردي و ديشلري بيربيرينه دهييردي. تئلفونون دستهييني آغزينا توتوب حيرصله:
-باري گل اؤز آزادليغييين كاغيذيني امضا ائت، -دئدي و تئلئفون دستهيي اليندن دوشدو.
صمد چارپايينين اوستوندن پتونو گؤتوروب، خديجهنين چيينينه سالدي. بير- ايكي دقيقه دوروخدو، سونرا هيجانلا خديجهني قوجاخلاييب، بير اليله توكلريني اوخشامايا باشلادي. خديجه باشيني صمدين سينهسينه قويوب، اونون قوللاري آراسيندا بير چنگه يوماغا دونوشدو، و صمدين قلبينين سسينه قولاق وئرهرك، ميزيلدادي: -سن كيمسن ، سني تانيميرام، آمما بو ايشيندن خوشلانديم، هم ده چوخ خوشلانديم. هاردايدين ايندييهدك.
صمد خديجهنين باشيني قالديريب، دوداقلاريني اؤپمهيه چاليشدي. خديجه جلد اؤزونو صمدين قوللاريندان قوپاريب، اوتاغا كئچيب، قاپيني باغلادي.
***
سوسن:
- اؤلورم، - دئدي، -- و الينده بيچن پارچاني كؤك وورماق اوچون يئره سالدي.
خديجه گوله- گوله، ساپلاديغي اينهني سوسنه وئريب:
- نييه تيرتير يئميسن بهيم، -دئدي.
سوسن:
-گول، - دئدي، - گؤروم من اؤلندن سونرا دا بؤيله گولهجكسن مي؟
خديجه:
- نييه گولمورم، - دئدي، - نه فيكيرائليرسن، اوتوروب قديم آداملار كيمي قاش- گؤزومو توكه دولدوروب، قيرخ نئچه گون قارا گئييب، هر هفته ده قبيرين اوستونه گلهجهييمي دوشونورسنسه، باغيشلا. سنه يالنيش دوشونجه ده اولدوغونو سؤيلهمهلييم.
خديجه قهقهه چكيب، سوسنه ديليني چيخارداراق:
-آهان بونودا دئمهلييم ، سن اؤلن گون بير زنجفيل حالواسي بيشيرهجهيم كي، حالواني يئيهن بارماقلاريندا يئيه. اوندا ياخشي دا رحمت اوخويارلار سنه، من ده ثاواب ائلهرم.
سوسن:
-اؤلهسن، منه ده قوربان اولاسان، - دئدي.
خديجه:
-نييه، من كي دئميرم اؤلورم. سن دئييرسن... خديجه سؤزونو داوام وئرمك ايستهييردي، آمما، سوسنين دولان گؤزلري سؤزونو آغزيندا قويدو.
خديجه ديسكيندي. سوسن ضعيف دئييل دئ. اونا ياناشيب اليني سوسنين الي اوستونه قويوب گؤزلرينين ايچينه باخاراق:
-نه اولوبدور، -دئدي؟
سوسن:
- رحيميم ده بير شئي واردير، - دئدي و ايچيني چكدي.
خديجه مونتظير دورموشدو.
سوسن چيينلريني يوخاريا آتدي:
-نه بيليم، آرتيق بير تيكه ، -دئدي-، بير غودده، ائشييه ده چيخيب دير. اليمي ووراندا اليمه دهيير. سنجه سرطاندير مي؟
خديجه بير سيلله سوسنين باشيندان ووردو:
-ديليني ديشله، - دئدي، - قورخما بير شئي يوخدور اينشاآللاه. دوكتورا گئدهريك، هر شئي بللهنهر.
سوسن:
-يحيا قويمور، دوكتورا گئتمهيه حاققين يوخدور دئيير.
صمد هارا گئتميشدين دئييه، -- خديجهنين اوستونه يومولدو.
خديجه: دوكتورا گئدهجهيمي سنه دئميشديم، --دئدي.
صمد: ايثبات ائله، -- دئدي.
خديجه الينده كي داوا موشامماسيني صمدين گؤزو قاباغينا توتدو. صمد عصبيلهشيب:
سنين هئچ بير شئيين يوخدور دئديم. دوكتورلارين الي آلتيندا اولماغي چوخمو سئويرسن. بوش يئره داوا يئمهيه چوخمو علاقن واردير؟ توت بو دا سنين داوالارين. - دئييب، موشامماني خديجهنين اليندن آليب دووارا چيرپدي، داوالارين شوشهلري سينيب، يئره تؤكولدو.
خديجه چيغيردي:- نه ائلهييرسن، - دئدي و سونرا دلي آداملار كيمي قاچيب موشمماني يئردن گؤتوروب بير ده دووارا چيرپدي و آغلايا- آغلايا صمده :
-بو دا سنين، - دئدي.- راحات اولدون مو؟
صمد صاباح بير موشمما داوايلا گلدي، خديجهيه:- باغيشلا دئدي. اؤز اليمده دئييلدي، بو دا سنين داوالارين.
خديجه الينين دالينان صمدين اليني گئري قايتاريب، اونا:- بونون هئچ بير فايداسي يوخدور، هئيكليمه آفتافا گؤتورندن سونرا ...
صمد ائعتيراض ائتمهيه چاليشدي. آمما، خديجه اونون سؤزونو كسيب:- بيليرسن، تويدان سونرا حننا نهيه لازيمدير؟ - دئدي.
خديجه بير درين آه چكيب، سوسنه:
-نييه، -دئدي.
سوسن:
-بيلميرم، بير شئيين يوخدور، - دئيير، - داوا درمانا سالما اؤزويون. دور من گليم، اؤزوم دوكتورا آپارارام دئيير. مسله بوردادير كي، اهوازا يوك آپاريبدير. نه زامان دؤنهجهيي ده بللي دئييل.
خديجه:
-غلط ائلهيير، آنلامير. - دئدي، - ايكينجي صمد اولوبدور، او دا. اونادا چوخ اؤز وئرميسن. ايندي ده آستارين ايستهيير. صاباح دوكتوردان واخت آلارام سنه!
سوسن:
-صاباح يوخ ، -دئدي. ايكي گوندن سونرايا وقت آل، چوخ ايشيم واردير. موشتريلرين پالتارلاريني تحويل وئرمهلييم.
***
صمد، - سوسن اؤلدو، - دئدي.
خديجه نيفرت دولو باخيشلاريلا، اوزاقدان صمده باخيردي.
سمانه، خديجهيه ياناشيب: صمددن چوخ مو موتنففيرسن ؟-دئدي.
خديجه تعججوبلا سمانهيه باخدي:- هاردان بيلدين؟ - دئدي.
سمانه:
- باخيشلاريندان، - دئدي.
خديجه:
-صمد، - سوسن اؤلدو، - دئدي.
سمانه:
-سوسنين اؤلوم خبريني هر كس سنه وئره بيلهردي، -دئدي، - من بئله! من دن ده بؤيله موتنففير اولاجاقدين؟
خديجه باشيني توولاييب:- بيلميرم، - دئدي، - و دوغروداندا بيلميردي. ايكي حيسسين آراسيندا قالماق ياواش- ياواش اونو آياق دان ساليردي. صمده عاشيق دئييلدي. آمما اونو سئويردي. اونو سئويردي چونكي اون ايل ايدي اونونلا بير سقف آلتيندا ياشاميشدي و اونونلا بير يئرده ياتيب، سئويشميشدي. اونا عادت ائلهميشدي. اوندان نيفرت ائديردي چونكي بير-بيرلريني آنلايابيلميرديلر، چونكي او صمد ايستهين آرواد اولا بيلميردي و صمد ده او ايستهين ار.
سمانه:
-سوسنين واختي قوتولموشدو، - دئدي و خديجهنين فيكريني داغيتدي.
- اونو قيزيل قفس ايچينده ده ساخلاسايديق او گون اؤلهجهيدي. يئددي گوندور بونا فيكير ائديب، ايندي صراحتله ياخشي اولدو كي اؤلدو دئييرم.
خديجهنين گؤزلري دؤرد اولموشدو و آغزي آچيق قالميشدي. بونا اينانا بيلميردي.
سمانه:
-سوسن سون گونلرده چوخ يورولموشدو. دايانميشدي آرتيق. بننا- فهله ايله ائوده ايشلهييردي. كرپيج چكيردي. چومور توتوردو. لهيهن- لهيهن سيمان اويان-بويان ائديردي. خيياطخانادا گلن- گئدنين نازيله اويناييردي. بورج- خرج ايچينده غرق اولموشدو. آرمانلاچالماق دا بير طرفدن. بيليرسن ايندي بو زاماندا اوشاقلارلا چالماق اؤزو يئكه بير ايشدير، او دا دهدهسيز. يحيا هئچ وقت يوخ ايدي. اولاندادا بير موسافير كيمين ايدي. هر دن بير يولو دوشنده سوسنين ائوينده دوشوردو و سوسن مجبور اؤلوردو اونا آيري خدمات دا وئره، چونكي اري ايدي. سوسن سون گونلرده بوندان چوخ ناراضي ايدي. دئييردي اؤزومو بير فاحيشه كيمي حيس ائديرم. او دا پول سوز بير فاحيشه و بو ايشدن عذاب چكيردي.
سمانه درين بير آه چكيب، داوام ائتدي:
- اؤلومو مصلحت ايدي. ايندي ده يحيا ايله، افسانهنين ارتيباطي. قالسايدي، بونا هئچ دايانا بيلمز ايدي وحتم اليندن بير خطا چيخاردي. پس اؤلومومصلحت ايدئ. سن سوسنين اشتيباهيني تيكرار ائلهمه، اوشاغين دا يوخدور، بو اؤزوسنه بير ايمتييازدي. فيكيرلش و دوغرو بير تصميم توت.
خديجه توتولدو. بير اوشاغي اولماغي چوخ ايستردي، آمما بونو ايستهمهيه نه اؤزو نه ده صمد جورعت ائتميشدي.
كيشيلر قبير اوستوندن چكيليب. قادينلارين فاتيحه وئرمهلرينه يئر آچديلار. سمانه قاچا-قاچا اؤزونو سوسنين قبيرينه يئتيريب. بير كيچيك داش يئردن گؤتوردو و سوسنين تزه ائوينين قاپيسيني دويدو. سس چيخمايينجا شيون چكيب آغلادي و هاميني دا آغلاتدي.
خديجه سوسندن غافيل قالماغيندان اؤزونو ملامتلهدي، بو نئچه واختدا صمدله چيرپيشماقدان الي اولموردوكي آيري بير شئيلره فيكير وئرسين». بير آز قبير اوسته اوتوردو و سمانهنين دئديكلرينه فيكر وئريب، سمانهيه:
- سنجه سوسني ماشين ووراندا نمنهيه فيكر ائلهيرميش، -دئدي، - سمانه سسسيز قالسادا، خديجه:- بو ايشله نه جور باشاچيخاجاغيمي بيلميرم، - دئييب، قبير اوستوندن دوردو. هامييا باش- ساغليغي وئريب. صمده ياناشدي. ايكيسي بيرليكده آدديم آتديلار.
خديجه بوش قبيرله باخيب اؤزويله:- هانسي منيمكي اولاجاقدير؟ نه زامان مني ده بؤيله گتيرهجكلر؟- دئيه، صمده باخدي:
- سنينله دانيشمالييام ، -دئدي.
صمد:
-بورا يئري دئييل، - دئدي.
خديجه :
- يوخ، لاپ دا يئري دي، -دئدي، - بوردا آدامين فيكري ساعات كيمي دقيق ايشلهيير. بيليرسن نييه؟ چونكي بو فيكير ده كي، اوول -آخيري اونون دا يئري بورادير، نه زامان گلهجهيينه فيكير ائدير و بو كي، نييه بو قاليب- قالان گونلريندن ياخشي ايستيفاده ائلهمير. آمما، بوردان چيخدي ياديندان چيخير ياريم ساعات قاباق نهجور فيكير ائديرميش. منده ياديمدان چيخماميش و پئشمان اولماميش سنه سؤزومو دئمهلييم. بير درين آه چكيب:
- يورولموشام ، - دئدي، - بيليرم كي، سن ده يورولوبسان. سن دن آيريلماق ايستهييرم.
صمد خديجهنين اوستونه يومولدو، خديجهنين آناسي آرايا كئچيب:- اوغول بو نه ايشدير؟ وآللاه ايكينيزده يانيليرسيز. سيزين دردينيز فقط ايكينيزينده بير باتمان اولدوغونوزدو. بسدير. بير دفه ده بيرينيز ياريم باتمان اولون. -دئدي
صمد:- سني بوشوياجاغام، - دئدي، - هئچ زاد دا وئرميهجهيهم. لوت-پوت ائشييه اؤتورهجهيم، اوندا كئفييين سوروشارام خانيم. بير آرواد كي بيلمهدي اريله نه جور دانيشا، نه جور ائحتيرام قويا بوندان آرتيق اولانماز.
خديجه:- هر زامان سن منه ائحتيرام قويماغي اؤيرهشسن منده سنه ائحتيرام قوياجاغام. ائحتيرام قويمازسان، ائحتيرام دا گؤرمهيهجكسن، ائشيتدين ؟
صمد ايكي سيلله اؤزونه ووردو. خديجهنين آناسي قاباغا قاچيب صمدين اللريني توتدوب اونا: - بالا بو نه ايشدير بؤيله، حيرصييهن بير آز توستو وئر.
صمد: -آنا اونون دردي آيري زاددير چوخدان ايستهيير مندن بوشانسين، حتم بيريني تاپيب، باشي آلتينا قويوبدور.
خديجه گولدو:- چوخ سئفح سن!- دئدي. - نه اينكي سندن گول توتموشام . دوز دئييرسن او بيريسيندن ده گولاب توتاجاغام. بير گون بو ايشي اؤزوم گؤرهجهيم. بوندان موطمئن اولا بيليرسن. قويوب گئدهجهيم سنين ادالارين اليندن. اوندا ائعتيراض ائتمهيه حاققين يوخدور.
صمدين آياقلاري بوكولدو. زورلا تعادولونو حيفظ ائدييب. خديجهيه باخدي.
خديجهنين گؤزلرينده قطعي بير تصميمين ايزي وارايدي. صمد بو باخيشلاري تانييردي. بو باخيشلار ديلسيزجه:- خديجه سؤزوندن دؤنمهيهجك- دئييرديلر.
خديجه صمدين اليني توتدو و اوخشاياراق:
- بو بيزيم ايكيميز اوچون ده لازيمدير، - دئدي، - اينان منه، ايكيميز اوچون ده تزه بير فورصتدير. هئچ اولمازسا قالان عؤمروموزو آراميشده ياشاريق و...
خديجه اليني چكمك ايستهدي. آمما صمد ايكي الي ايله خديجهنين اليني توتدو. خديجه صمدين گؤزلرينين ايچينه باخيب:
- واقئعيته باخسان بو ياشاييش دئييلدي كي بيز ائلهييرديك، - دئدي، - بيرياشاييش كي ايچينده تفاهوم اولمادي ياشاييش دئييل بير جور تحمول دير. تحمول قورتاران زامان او ياشاييش ده باشا گلير.
خديجه بير درين آه چكيب:- ياشاييشيميزين دفتريني سطيرين اووليندن يازماليييق، - دئدي و اليني قوپاريب گئتدي.
24/8/86
